Aqtóbede ózen jaǵasyndaǵy saıajaı turǵyndary jańa aýdanǵa kóshiriledi
Aqtóbe qalasyndaǵy óndiristik aımaqta qonys tepken Mahambet, Vohr, Qurylysshy-1, ÝVD-4 baý-baqsha ujymdary asa qaýipti jerde ornalasqan. Sondyqtan jergilikti bılik bul problemany túbegeıli joıý úshin Úkimetke jańa joba usyndy.
«Bul baý-baqsha turǵyndaryn qala irgesindegi Sazdy aýylyna kóshirý josparda bar. Daıyn jerge ınjenerlik-kommýnıkatsııalyq jeli tartýǵa arnalǵan jobalyq-smetalyq qujaty, úı jobalary da ázirlendi. Úkimet usynysty qarap jatyr. Tórt baý-baqsha ujymynyń turǵyndarynan qujat qabyldaý jumysy júrip jatyr. Tekserý bastaldy»,-dedi Bekbolat Nurashev.
Jospar boıynsha ár úıdiń aýmaǵy 78 sharshy metr bolady. Eger Úkimet usynysty maquldasa, aldymen turǵyndardyń eski úılerin baǵalaý bastalady. Eski úıdiń quny jańa baspananyń teń jartysyn qurasa, qurylysty aıaqtaýǵa nesıe beriledi. Barlyǵy 366 úı salý josparlanǵan.
Eske salsaq, ótken jyly Aqtóbe qalasynda birneshe aýyl sýǵa ketken bolatyn. Eń kóp zardap shekkeni Mahambet, Vohr, Qurylysshy-1, ÝVD-4 baý-baqsha ujymdarynyń turǵyndary boldy. Bul aýyldyń adamdarymen óńir basshysy Berdibek Saparbaev kezdesip, sý ortasyndaǵy turǵan úılerdi qarap shyqty. Keıin kóshirý týraly usynys Úkimetke joldandy.