Aqtóbede ortalyq qyzmetkerleri múgedek balalardy uryp-soqty dep aıyptalyp jatyr

AQTÓBE. QazAqparat - Aqtóbede týa bitti sal aýrýyna shaldyqqan, Daýn sındromymen aýyratyn balalardy uryp-soǵý faktisi tirkeldi. Qazir qylmystyq is qozǵalyp, tergeý bastaldy, dep habarlaıdy QazAqparat tilshisi.

Keshe Aqtóbe qalasy Astana aýdanynyń prokýratýrasyna №1 áleýmettik qyzmet kórsetý ortalyǵyndaǵy múmkindigi shekteýli tárbıelenýshilerge (týa bitti sal aýrýy, Daýn sındromy, barlyq dárejedegi olıgofrenııasy bar balalar tárbıelenedi) qatysty zorlyq-zombylyq jasalǵany týraly habarlama tústi.

«Prokýrorlar dereý osy mekemege baryp, ondaǵy beınebaqylaý kamerasy arqyly ortalyq qyzmetkerleri kámeletke tolmaǵan tárbıelenýshilerge qatysty birneshe ret uryp-soǵý, basqa da zorlyq-zombylyq áreketterin qoldanǵanyn anyqtady. Atalǵan fakti boıynsha aýdan prokýratýrasy Qylmystyq kodekstiń «Qınaý« baby boıynsha sotqa deıingi tergep-tekserý bastaldy. Tergeý júrgizý úshin qylmystyq is materıaldary Aqtóbe qalasynyń polıtsııa basqarmasyna joldandy»,- dep habarlady oblystyq prokýratýranyń baspasóz qyzmeti.

Qazir atalǵan derek boıynsha tergeý júrip jatyr.