Aqtóbede ortalyq alańdaǵy kıiz úılerde kórme ótti
Aqtóbe qalasynda Naýryz merekesi keń kólemde toılandy. Qaladaǵy Ábilqaıyr han dańǵylynyń bir bóligi 10 saǵatqa jabylyp, turǵyndardyń alańsyz kontsert tamashalaýyna, túrli kórme-jármeńkege qatysýyna múmkindik jasaldy. Óńir jurtyn oblys ákimi Ashat Shaharov quttyqtady.
«Naýryz jyl basy ǵana emes, bul eń aldymen bereke men birliktiń bastaýy, izgilik pen jaqsylyqtyń meıramy. «Bul kúnge de aman-esen jettik» dep halyq máre-sáre bolyp, ókpe-renishti umytyp, bir qazannan naýryz kóje iship, toılatqanyn bilesizder. Bulaqtyń kózin ashyp, aǵash otyrǵyzyp, egin salǵan. Naýryzdyń osy qadir-qasıetin aıshyqtaıtyn tujyrymdama bekitildi. Ár kún belgili bir taqyrypqa arnalyp, tereń mazmun, mánge ıe boldy», - dedi Ashat Shaharov.
Ortalyq alańdaǵy kıiz úıdiń bárinde túrli mekemeniń kórmesi uıymdastyrylǵan. Olarǵa qaladaǵy bilim berý jáne mádenıet mekemeleri jaýapty boldy.
«Kórsemsýret lıtseıi, qaladaǵy «Dúnıe» kolledji birigip, ulttyq buıymdardy kórmege qoıdyq. Keli-kelsap, qyz jasaýy sekildi túrli buıym bar. Adamdar óte kóp kelip jatyr. Ájeler kımeshektiń úlgisin qarap, kıip kórdi. Biz jylda Naýryz merekesine qatysyp júrmiz. Bir kezderi áz- Naýryzymyz umyt qalsa, qazir qaıta jańǵyrdy. Úlkender ǵana emes, balalar da salt-dástúrge qushtar. Balalar óz tegi men ata-babasyn osydan uǵyp, sezinip ósedi», - dedi tarıhshy Almagúl Qaıralapına.
Al mýzeı qyzmetkerleri bolsa ulttyq buıymdardy kópshilikke tanystyrdy.
«Túıe saýýǵa arnalǵan túıemoınaq kórmege qoıyldy. Bul buıym teriden jasalǵan. Bıe saýýǵa arnalǵan kónek te bar. Ony aqtóbelik sheber Nurlan Jaqybaev jasaǵan. Torsyq, qorjyn da kórmege ákelindi. Qazaq qyzdarynyń, er azamattarynyń ulttyq kıimi de kópshilik nazaryna usynyldy. Qasqyr, túlki terisi de bar», - dedi Keńes Odaǵynyń Batyry Álııa Moldaǵulova memorıaldy mýzeıiniń ekskýrsııa júrgizýshisi Ásemgúl Amangeldi.