Aqtóbede órt bolyp, balabaqshadan 35 bala evakýatsııalandy

AQTÓBE. QazAqparat – Aqtóbe qalasynda restorannan órt shyǵyp, kórshi ornalasqan balabaqsha ǵımaratynan 35 bala evakýatsııalandy, dep habarlaıdy QazAqparat Tótenshe jaǵdaılar mınıstrliginiń saıtyna silteme jasap.

«7 tamyz kúni saǵat 12:16-da «112» qutqarý qyzmetine Aqtóbe qalasy, Astana aýdanynyń Aǵaıyndy Jubanovtar kóshesinde ornalasqan «Alefun» meıramhanasynda órt shyqqany týraly habarlama tústi.

№ 2 shaqyrtý rangi jarııalandy.

Órtti sóndirýge 48 adam men 12 tehnıka jumyldyryldy.

Shaqyrtý ornyna barǵan kezde meıramhananyń shatyry órtenip jatqany anyqtaldy.

Órt sóndirýshiler jalynnyń basqa ǵımarattar men úılerge taralýyna jol bermedi.

Meıramhana janynda ornalasqan balabaqshadan 40 adam, onyń ishinde 35 bala evýakatsııalandy.

Tilsiz jaýdyń aýmaǵy 280 sharshy metrdi qurady. Qaıtys bolǵandar men zardap shekkender joq», - delingen habarlamada.

Otpen kúres saǵat 13:06-da tolyǵymen toqtatyldy. Oqıǵa sebebi anyqtalyp jatyr.