Aqtóbede on jyl buryn jabylǵan Ózbekstanmen shekara beketi ashylady
Aldymen aýdan ákimi Baýyrjan Qanıev aýyl sharýashylyq, jol qurylysy, ınvestıtsııa tartý máselelerine toqtalyp, áleýmettik- ekonomıkalyq jumystardy baıandady. Aýdanda shaǵyn jáne orta kásipkerlik salasy artyp keledi. Ónerkásip óndirisiniń kólemi, bıyl segiz aıda 10936,8 mln teńgeni quraǵan.
«Prezıdent Qasym-Jomart Toqaevtyń tapsyrmalarynda halyqtyń ál - aýqatyn arttyrýǵa erekshe kóńil bólinip otyr. Sondaı-aq, 2018-2019 jyldary Shalqar-Bozoı baǵytyndaǵy avtokólik jolynyń 20 shaqyrymyna 611,2 mln teńge qarjy bólinip, ortasha jóndeý jumystary júrgizilse, aldaǵy jyly 50 shaqyrym joldy jóndeý josparda bar», - dep atap ótti óńir basshysy aýyl turǵyndarymen kezdesýde. Jıynda Aqtóbe oblysynyń prokýrory Marat Qaıbjanov aýdandaǵy quqyq buzýshylyq kórsetkishin baıandady. Bıyl aýdanda 123 qylmystyq quqyqbuzýshylyq tirkelgen. Bul 2018 jylmen salystyrǵanda 35 qylmysqa az. Mal urlyǵyna qatysty qylmystar ótken jylmen salystyrǵanda 22-den 16-ǵa tómendegen. Degenmen osy baǵyttaǵy árbir ekinshi mal urlyǵy ashylmaı otyr. «Aýdan halqynyń turmys-tirshiliginiń basym baǵyty mal- sharýashylyǵy óndirisi bolyp tabylady. Sondyqtan urlanǵan ár mal basy turǵyndardyń áleýmettik jaǵdaıyna keri áserin tıgizýde», - dedi Marat Qaıbjanov. Aımaq basshysy aýdandyq polıtsııa qyzmetkerlerine qylmystyń aldyn alýdy, qajetti oryndardy beınekameralarmen jabdyqtaý jumysyn jandandyrýdy tapsyrdy. Bozoılyq turǵyndar oblys ákimine ınternet jelisin tartý, káriz, elektr júıelerin qaıta jańǵyrtý máselelerine qatysty suraqtar qoıdy. Atalǵan túıitkildiń sheshilýine yqpal etýdi surady. Ońdasyn Orazalın aýdan ákimine ınternet jelisin kelesi jyldyń sońyna deıin yjdaǵattap engizýdi tapsyrdy. Sonymen qatar «Qarapaıym zattar ekonomıkasy» baǵdarlamasy aıasyndaǵy jumystardy, aýdandaǵy halqy sany 50 adamnan az turatyn 9 eldimekendi qoldanystaǵy zańnama aıasynda taratý máselesin qarastyrýdy,tamaq ónerkásibine ınvestıtsııalar tartý jumystaryn kúsheıtip, áleýmettik mańyzy bar azyq-túlik baǵalarynyń óspeýin baqylaýda ustaý qajettigin aıtty.Oblys ákimi keden beketiniń máselesin de tys qaldyrmady. «2005 jyly Bozoımen shektesetin Qazaqstan men Ózbekstan memleketteriniń shekarasy jabylǵan bolatyn. 70-ten astam adam jumys jasaǵan kedendik ótkizý beketinen kezinde shamamen aıyna 500-600 deıin avtokólik qatynady. ıAǵnı, kórshiles respýblıkadan kókónis, jemis-jıdek t.b turmysqa paıdalanatyn zattar tasymaldandy. Aldaǵy ýaqytta osy keden beketin qaıta ashýdy qolǵa alyp jatyrmyz. Joba júzege asqan jaǵdaıda Ózbekstannan arzan kókónis, baqsha ónimderi jemis-jıdekter tasymaldanyp, bizdiń elden mal ónimderi ótkizilmek»,- dedi óńir basshysy. Turǵyndar jer, mal sharýashylyǵyna qatysty saýaldarmen oblys ákiminiń jeke qabyldaýynda boldy. Aımaq basshysy Baýyrjan Qanıevke aýyl sharýashylyq kásibin qolǵa alýǵa nıetti turǵyndarǵa qoldaý kórsetýdi tapsyrdy. Ońdasyn Orazalın budan soń Qulandy shekara beketinde bolyp, áskerı qalashyqty aralady. Zastava basshysy Qarshyǵa Teshebaı oblys ákimin jeke qurammen kezdestirip, jumystarmen tanystyrdy. Shekaralyq zastava qajetti materıaldyq- tehnıkalyq bazamen túgel qamtylǵan.