Aqtóbede oqýshyny mektepke daıyndaýǵa qansha qarajat kerek
Aqtóbe oblysy boıynsha balalardy mektepke daıyndaý úshin bazar men saýda oryndarynda, keńse taýarlaryn satatyn dúkenderde túrli jármeńkeler uıymdastyrylyp jatyr. Sáıkesinshe satyp alýshylar sany da artty. Qazirgi kezde Ortalyq bazar mańynda mektep jármeńkesi ótip jatyr. Munda oqý quraldarymen qatar mektep formasyn tańdaýǵa bolady.
Oqýshy úshin asa qajetti 12 bettik dápter quny – 25-30 teńge. Qalam 50-250, óshirgish 60-150, túrli tústi qaryndash 350-1200, qaryndash ushtaǵysh 70-120, kúndelik 500-700 teńge. Sýret salýǵa arnalǵan albom 200-250 teńge turady. Oqýshylarǵa arnalǵan sómke sapasyna qaraı 5 myń teńgeden bastalady. Bazardan 10-15 myń teńgeniń sómkesi de tabylady. Oqýshylarǵa arnalǵan mektep formasyn 10-15 myń teńgege salyp alýǵa bolady. Al sport kıimi talǵamǵa qaraı tańdalady. Mundaǵy fýtbolka quny 2 myń teńgeden, al sporttyq kıimdi 10-15 myń teńgege saýdalaıdy. Aıaq kıim quny da jasy men sapasyna qaraı 10 myń teńgeden joǵary.
Qaladaǵy sýpermarket pen gıpermarkette oqý quraldary buryshy bar
Aqtóbe qalasyndaǵy iri sýpermarket, gıpermarketterde de oqý quraldary satyla bastady. Máselen, «Anvar» sýpermarketinde 12 bettik dápter quny – 17 teńge. Bir ereksheligi, mundaǵy dápterdiń beti qońyrqaı tartyp turady. Oqýshylar kóbine sapalysyn tańdaýǵa tyrysady. Al qalyń dápterler betine qaraı 119 teńgeden bastalady. Munda da dápter, kitap qaptaǵysh pen qalam, qaryndash, óshirgish, túrli tústi boıaýlar men albom satyp alýǵa bolady. Іri saýda oryndarynda kıim-keshek bolǵanymen, keıbirinde tek keńse taýarlary ǵana satylyp jatyr.
Qalada úsh kúndik jármeńke bastaldy
Aqtóbe oblystyq bilim basqarmasynyń málimetine súıensek, qalada mektep jármeńkesi bastaldy. Úsh kún boıy otandyq kıim óndirýshiler óz ónimin usynady.
«Mektep jármeńkesin bilim, kásipkerlik, ındýstrııalyq-ınnovatsııalyq damý basqarmalary, Aqtóbe oblysynyń kásipkerler palatasymen jáne dızaınerler men tiginshiler qaýymdastyǵymen birlesip uıymdastyrdy. Jármeńkede otandyq óndirýshilerdiń de, kásipkerlerdiń de taýarlary tómendetilgen baǵamen usynylyp jatyr. Aqtóbe oblysynyń taýar óndirýshileri ǵana emes, basqa óńirlerdiń kásiporyndary da qatysýǵa nıet bildirdi. Іs-sharanyń maqsaty — otandyq taýar óndirýshilerdi qoldaý jáne balalardy mektepke daıyndaý úshin ata-analarǵa qoldaý kórsetý. Sondaı-aq oblystyq bilim basqarmasy balalardyń quqyqtaryn qorǵaý bóliminiń mamandary quqyqtyq, áleýmettik jáne psıhologııalyq máseleleri boıynsha keńes berdi», - dep habarlady oblystyq bilim basqarmasynyń baspasóz qyzmeti.
Mektep formasynyń túr-túsin ár mektep ákimshiligi ózi bekitedi
Aqtóbe qalasyndaǵy mektepter qoıý kók, sur nemese torly mektep formasyn tańdap jatyr. Mektep formasynyń úlgisin oqý jyly bastalmas buryn synyp jetekshileri habarlaıdy.
«Mektep formasyna qoıylatyn talapty mınıstrlik bekitken. Úlgisi klassıkalyq bolýy kerek. Er balalar kostıým-shalbar, jaket, aq jeıde. Al qyzdar sarafan nemese beldemshe, qajet bolsa kostıým nemese jaket kııýge bolady. Shalbar klassıkalyq úlgide jáne tobyqtan tómen bolýy tıis. Al túr-túsin ata-analar komıteti, mektep ákimshiligi jáne qamqorshylyq keńesi birlese sheshedi. Mektepishilik jınalysta bekitiledi», - dedi Aqtóbe oblystyq bilim basqarmasy bóliminiń bas mamany Gúldana Bakıeva.
Aqtóbe oblysy boıynsha kúnkóris deńgeıinen tómen tabysy bar otbasy, ataýly áleýmettik kómek alatyn top pen tótenshe jaǵdaı kezinde zardap shekken otbasy balalary úshin 600 mln teńgeden astam qarjy qarastyryldy. Ár balanyń ata-anasyna 40 500 teńge aýdarylady. Mundaı bala sany – 16 myńǵa jýyq. Sonymen birge «Mektepke jol» aktsııasy bastaldy.