Aqtóbede oqýshy kóz jumǵan elevator ǵımaraty súrilmeıtin boldy

AQTÓBE. QazAqparat – Aqtóbe oblysynyń ekonomıkalyq soty qańyrap bos turǵan elevatordy súrý týraly ákimdiktiń talap-aryzyn qanaǵattandyrmady. Eski elevatorda bıyl oqýshy qaza bolǵan edi, dep habarlaıdy QazAqparat tilshisi.

Aqtóbe oblystyq mamandandyrylǵan aýdanaralyq ekonomıkalyq sotynda qalalyq Qurylys jáne sáýlet bóliminiń aryzy qaraldy. Ákimdik Forte Bank-ke tıesili nysandy buzýdy talap etti.

«Sot anyqtaǵandaı, 2016 jyldyń 8 shildesi kúni satyp alý – satý jáne qabyldaý-tapsyrý aktisi bolyp, ǵımarat Forte Bank-ke ótti. Menshik quqyǵy ýákiletti organda 2020 jyldyń 19 naýryzynda tirkeldi.

Azamattyq isti qaraý kezinde talap qoıýshy qurylysty bólshekteý jáne buzý jónindegi jumystardy júrgizý qajettigi týraly birjaqty qorytyndy jasaýǵa múmkindik beretin dáleldemeler usynbady. Sondaı-aq talap qoıýshy men úshinshi tarap, ıaǵnı polıtsııa, tótenshe jaǵdaılar qyzmeti, oblystyq Memlekettik sáýlet-qurylys baqylaý basqarmasy ǵımarattyń qandaı da bir krıterıı boıynsha apatty, qaýipti nysanǵa jatatynyn, ony buzý qajet ekenin anyqtaıtyn dáleldeme bermedi. Talap-aryz qanaǵattandyrylmady», - dep habarlady Aqtóbe oblystyq mamandandyrylǵan aýdanaralyq ekonomıkalyq sotynyń baspasóz qyzmetinen.

Eske salsaq, bıyl jazda Aqtóbede oınaýǵa ketip, úıine oralmaǵan bala eski elevatordyń astyq saqtaıtyn rezervýarynan tabylǵan bolatyn. Tereńdigi 10 metr bolatyn rezervýardan tabylǵan bala arada 20 kún ótkende aýrýhanada esin jımastan kóz jumdy.