Aqtóbede oqýshy ólimine qatysty taǵy birneshe kúdikti qamaldy

<p>AQTÓBE. KAZINFORM - Temir aýdany Qopa aýylyndaǵy oqýshy ólimine qatysty istiń baby ózgertildi. Qazirgi kezde 10 kúdikti qamaýda otyr. Taǵy ekeýiniń qaıda júrgenin polıtsııa anyqtaıdy.</p>

Aqtóbe oblysy Temir aýdany Qopa aýylyndaǵy oqýshy óliminen soń buzaqylyq jáne densaýlyqqa qasaqana aýyr zııan keltirý baptary boıynsha is qozǵaldy. Qazirgi kezde is Qylmystyq kodekstiń «Adam óltirý» babyna aýystyryldy. Búgin kúdikti oqýshylardyń ata-analary oblystyq prokýratýra mańyna jınalyp, sebebin surady.

«Alǵashynda Qylmystyq kodekstiń 106 baby 3 bóligimen qamaldy. Esh dádelsiz, negizsiz 99 baptyń 2 bóligine aýystyryp jiberdi. Polıtsııa, prokýratýra basshysyna barǵanymyzben naqty sebebin bile almadyq. Balam 4 qyrkúıekten bastap qamaýǵa alyndy. Bul balalar qasaqana óltirgen joq. Birge aralasyp, birge oınap júrgen balalar. Balam 14 jasta. Adam óltiremin dep barǵan joq. Meniń balamnyń ózi de osy jerde jábirlenýshi, oryndaýshy bolyp tur. 11 synyp balalary uıymdastyryp, aparǵan. Urýǵa májbúrlegen. Qylmystyq kodekstiń 99 babyna da, 106 babyna da kelispeımin. Qasaqana ólim joq. Mektepte álemjettik bar. Sıstema dep atalady. Birneshe jyl bolǵan. Byltyr osy jaǵdaımen is tirkelip, balalar ustalyp, aıaqsyz qaldy. Ózimniń balam 10 synypqa kelgende qurbany bolyp tur»,- dedi Nurjan Tólebaev.

Sonymen birge 11 synyp ata-analary da óz oıyn aıtty.

- Balam Eldos Jańabaı 11 synyp oqýshysy. Alǵashynda iske kýáger retinde shaqyrdy. Al 14 qarasha kúni shaqyrǵanda úsh balany qamady. Balalardyń bári jas, olar adam óltiremin dep barǵan joq. Sol kúni balam qasymda shóp orýda boldy. Іnimmen birge jeńil kólikpen aýylǵa jarty saǵat buryn erte ketti. Shaı iship otyrǵanda dostary habarlasyp shaqyrady. Balam ol araǵa eshteńeni bilmeı bardy. Uıymdastyrýǵa qatysy joq. Ol barǵanda balalar jınalyp turǵan. Úlken synyp balalary tómen synyptarǵa áńgimeler aıtqan. Bir-birden uryp shyqqan. Balam óz erkimen urmaǵan. Qasyndaǵy balalardan qoryqqan,- dedi ata-ana Baýyrjan Shúkirov.

Qazir qamaýda otyrǵan taǵy bir kúdiktiniń anasy Marjan Ibraeva oqıǵa ornynda bıyl ǵana mektep bitirgen jábirlenýshiniń týysy da bolǵanyn habarlap otyr. Ol 11 synyp oqýshylaryn qaırap, artynsha ózi ketip qalǵan. Al balalar jábirlenýshi qulaǵan kezde jedel járdemge habarlasyp, ekeýi aýyl dárigerinen kómek suraýǵa barǵan.

- Balalar alǵashqy kómek kórsetken. Bul jerde Qylmystyq kodekstiń 99 baby negizsiz. Óte aýyr bap. Balalardyń qolynda qarý-jaraq joq,- dedi Marjan Ibraeva.

Ata-analardyń bári aýyldaǵy álimjettik máselesin moıyndap otyr.

- Álimjettik sıstema bar ekenin estidim. Ata-ana retinde ýchaskelik polıtsııaǵa, ınspektorǵa aıtyldy. Biraq jaýapsyz jyly jaýyp qoıdy. Saldarynan qaıtalanyp tur,- ata-ana Darııa Bazylbekova.

Aqtóbe oblystyq polıtsııa departamentiniń baspasóz qyzmeti bul iske qatysty taǵy eki adamnyń qaıda júrgeni naqtylanyp jatqanyn habarlady.

- Polıtsııa departamenti adam óltirý deregi boıynsha sotqa deıingi tergeý júrgizip jatyr. Oqıǵaǵa qatysy bar barlyq adam anyqtaldy jáne 10 kúdikti qamaldy. Sonymen birge eki adamnyń mekenjaıy naqtylanyp jatyr,- dep habarlady Aqtóbe oblystyq polıtsııa departamentiniń baspasóz qyzmeti.

Eske salsaq, 2 qyrkúıek kúni 9 synyp oqýshysy mert boldy. Osy oqıǵadan soń 10 jáne 11 synyp oqýshylary qamaýǵa alyndy.