Aqtóbede oblystyq pikirsaıys týrnıri ótti
Ashyq pikirsaıys týrnıriniń maqsaty - jastar qatarynan sheshendik sheberligi bar, óziniń kózqarasyn saýatty jáne naqty qorǵaı alatyn jas kóshbasshylardy izdeý jáne olarǵa qoldaý kórsetý, naqty máselelerdi sheshý, jastar men jasóspirimderdiń bos ýaqytyn tıimdi uıymdastyrý, patrıotızmdi damytý jumystaryn keńinen nasıhattaý.
Týrnırge joǵary jáne kásiptik-tehnıkalyq kolledj stýdentterinen 24 komanda qatysty.
Týrnır barysynda Dinmuhammed Qonaevtyń jetistikteri, qazaq kınematografııasy, shyǵys jáne batys mádenıetteri, QR Táýelsizdiginiń nyshandary syndy jastar arasynda ózekti taqyryptar qozǵalady.
«Saıys Q. Jubanov atyndaǵy óńirlik ýnıversıteti, oblystyq jastar resýrstyq ortalyǵy jáne «Zaman bizdigi» ıntelektýaldy elıtaly odaǵynyń uıymdastyrýymen ótti. Týrnır bir aı buryn josparlanyp, daıyndaldy. D.Qonaevtyń 110 jyldyǵyna oraı ótkizilgen týrnır tulǵany ulyqtaýǵa, júrip ótken joly men eńbegin dáripteýge arnaldy. «Ómirdiń eki tiregi bar. Ol úıretýden jalyqpaý, úırenýden aıanbaý» dep D.Qonaev aıtqandaı, jastardyń belsendiligin arttyrǵymyz keldi. Jastar bul ortada tanymyn keńeıtip, oıyn ashyq aıta alady. Negizi biz qatysýshynyń taqyrypty jan-jaqty zertteýi, taldaýy, óz ustanymyn tanystyryp, ustanýyn baǵalaımyz. Qarsy pikir aıtqanda aqparattyń dáldigi mańyzdy. Saraptama da utqyr bolýy tıis»,- dedi uıymdastyrýshy Asylbek Tokmyrzaev.
Ýnıversıtet stýdenti belsendiler qataryna kirý úshin «Zaman bizdigi» ıntelektýaldy elıtaly odaǵynyń músheligine ótti. Úsh jyldan beri pikirsaıys oıyndaryn túsirip, áleýmettik jelilerge jarııalap júr. Tipti úzdik oıynshylarmen suhbattasyp, jastarǵa tájirıbe jınaýǵa septigin tıgizedi.
«Ózim pedagogıkalyq kolledjde bilim alyp júrmin. Al pikirsaıys klýby meniń ómirimniń bir bólshegi. Kezekti saıysqa eki apta boıy daıyndaldym. Belgili bir oıdy rastaý úshin ózińniń ómirlik ustanymyńa qarsy pikir aıtýǵa týra keletin shaq bolady. Mundaı kezde qıyn, biraq tyǵyryqtan shyǵýǵa bolady. Ózime erkin taqyryp unaıdy. Bul joldy ári qaraı jalǵastyramyn jáne men eldegi jaǵdaıdy taldap, óz oıyn ashyq aıta alatyn tulǵa bolyp qalyptasqym keledi»,-dedi týrnırge qatysýshy Tomırıs Bekjanova.
Týrnırde birinshi oryndy «Sıngaı» komandasyndaǵy Aıdana Boranbaeva, Aqnur Qýanysh, ekinshi oryndy «Senseı» fraktsııasynan
Damır Tólegen, Alfııa Baktygalıeva jáne úshinshi oryndy «SuB-ZERO» fraktsııasynan Bıbolat Alpysbaıuly, Aıdar Abenov aldy. Al Aıdana Boranbaeva «Úzdik spıker», Amanqos Onkalbaev «Úzdik tóreshi» atandy.