Oqıǵa tańerteń Aqtóbe qalasy Sáńkibaı batyr dańǵylynda boldy. Jedel járdem kóligi men Toyota soqtyǵysty. Saldarynan jedel járdem kóligi bir búıirine qaraı aýdaryldy.
- Oqıǵa saldarynan jedel járdem kóliginde bolǵan naýqas medıtsınalyq mekemege jetkizildi. Polıtsııa júrgizýshilerdi jol qozǵalysy erejelerin qatań saqtaýǵa, jolda muqııat bolýǵa jáne arnaıy jaryq-dybys belgileri qosylǵan kólikterge jol berýge shaqyrady,- dep habarlady Aqtóbe oblystyq PD baspasóz qyzmeti.
Aqtóbe oblystyq densaýlyq saqtaý basqarmasy qazir naýqasty tekserip jatqanyn habarlady.
-Jedel járdem kóliginiń ishinde júkti kelinshek boldy. Ony júktiliginiń 39-aptasynda perzenthanaǵa ákele jatqan. Kelinshek jol-kólik apaty kezinde jabyq bas-mı jaraqatyn aldy, mıy shaıqaldy. Ol Aqtóbe medıtsınalyq ortalyǵyna jetkizilip, qosymsha tekserý júrgizilip jatyr. Jaǵdaıyn dárigerler baqylaýǵa aldy. Al jedel járdem brıgadasy qyzmetkerleriniń jaǵdaıy qalypty. Olar jaraqattanbady,- dep habarlady Aqtóbe oblystyq densaýlyq basqarmasynyń basshysy Erlan Sultangereev.
Buǵan deıin habarlaǵanymyzdaı, Aqtóbe-Atyraý tasjolynda eki kólik soqtyǵysyp, alty adam kóz jumdy. Oqıǵa Baıǵanın aýdany Qaraýylkeldi aýyly mańynda boldy. «VAZ» jáne «DAF» avtokólikteri soqtyǵysqan.