Aqtóbede nan baǵasy qymbattamaıdy - ákimdik

AQTÓBE. QazAqparat – Aqtóbedegi saqtandyrý qoryna jınalǵan un baǵany turaqty ustap turýǵa jetedi. Sonymen birge astyq shyǵymy da nan baǵasyn ósirmeýge múmkindik beredi, habarlaıdy QazAqparat tilshisi.

Áleýmettik azyq-túlik tizimine engen 32 túrli ónimniń 24-i Aqtóbeniń ózinde shyǵarylady. Tek qaraqumyq jarmasy, kúrish, qant, tuz, sarymsaq, burysh, alma, balyq ózge óńirlerden, ishinara ımport esebinen jetkiziledi. Óńirdi ózindik ónimmen qamtamasyz etý maqsatynda 2022-2026 jyldarǵa arnalǵan 77 iri ınvestıtsııalyq jobalar júzege asyrylmaq. Quny - 272,8 mlrd teńge.

«Saqtandyrý qorynda 3800 tonna un bar. Ony biz tórt iri naýbaıhanaǵa berip otyrmyz. Birneshe aýdandaǵy naýbaıhanalar da arzan baǵada un alady, sóıtip nan baǵasyn ósirmeıdi. Kelesi jyldyń naýryz aıyna deıin bári turaqty bolady. Nan baǵasy kóterilmeıdi. Sonymen birge astyq shyǵymy jaqsy. Sharýalar bıyl mol ónim alamyz degen senimde», - dedi Aqtóbe oblystyq aýyl sharýashylyǵy basqarmasynyń basshysy Isataı Espaǵanbetov.

Aıta keteıik, oblysta bir ǵana iri kásiporny ósimdik maıyn shyǵarady. Eki jyl buryn jańa seriktestik iske qosyldy. Jyldyq qýattylyǵy - 68 myń tonna.

«Búginde halyqty et ónimderi, un, nan ónimderi jáne kúnbaǵys maıy ónimderimen ózindik óndiris esebinen tolyq qamtamasyz etip otyrmyz. Sonymen qatar «Alqaptan sórege» jobasyn júzege asyrý maqsatynda Aqtóbe qalasynda «Tabys agro» áleýmettik pavılondar iske qosylyp,12 aýdannyń taýar óndirýshi kásiporyndary óndirgen óz ónimderin qala jurtshylyǵyna tómen baǵamen tikeleı satý múmkindigine ıe boldy. Oǵan qosa birneshe sharýa qojalyǵy et jáne sút ónimderiniń dúkenderin ashyp, tikeleı óz ónimderin ótkizedi», - dedi Isataı Espaǵanbetov.

Oblys turǵyndaryn et jáne sút ónimderi, kókónis, sondaı-aq basqa da ónimdermen qamtamasyz etý maqsatynda qyrkúıek aıynan bastap jyl sońyna deıin aýyl sharýashylyǵy jármenkesi ótkiziledi. Sondaı-aq oblysta turaqtandyrý qory jasaqtalady.