Aqtóbede munaı men gaz óndirisi artady

AQTÓBE. QazAqparat - Bıyl Aqtóbede munaı men gaz óndirý kólemi artady. Jospar boıynsha 6,2 mıllıon tonna munaı men 7 mıllıard tekshe metr gaz óndiriledi, dep habarlaıdy QazAqparat tilshisi.

Aqtóbede munaı men gaz óndirisin arttyrý týraly tapsyrmany oblys ákimi Berdibek Saparbaev berdi.

«Biz naryqtyń negizgi betalysy men óńirdiń áleýetin únemi taldap otyramyz. Ekonomıkanyń ári qaraı ósýi úshin barlyq múmkindiktiń bar ekenin bilemiz. Óndiris ornynyń basshylarynan shyǵarylatyn ónim kóleminiń tómendeýine jol bermeýdi suraımyn. Bul ásirese munaıshylarǵa qatysty. Jalpy, osy jyly quny 2 trıllıon teńgeniń ónerkásip ónimi óndirilýi tıis»,- dedi oblys ákimi Berdibek Saparbaev.

Jıyn kezinde B.Saparbaev toqtap turǵan kásiporyndardy iske qosý, kásipkerliktiń eksportqa baǵdarlanǵan sýbektilerin qoldaý, qazaqstandyq mazmundy arttyrý jumystary durys júrgizilmegenin atap ótti.

«Qazaqstandyq mazmun boıynsha ósim bar, biraq ol jetkiliksiz. Aqtóbe oblysynda, Qazaqstannyń ózge oblystarynda óndiriletin ónimdi shetelden tasymaý kerek. Ázirge men jaqsy basqarý jumysyn kórip turǵan joqpyn. Júıe qurýshy kompanııalardyń tóńireginde shaǵyn jáne orta bıznes sýbektilerin damytýdyń seriktestik baǵdarlamalary tıimdi júzege asyrylmaǵan»,- dedi ákim.

Aqtóbe oblysy ákiminiń baspasóz qyzmetiniń habarlaýynsha, jer qoınaýyn paıdalanýshylardyń, ulttyq kompanııalar men júıe qurýshy kásiporyndardyń satyp alýyndaǵy jergilikti taýarlar, jumystar men qyzmetter úlesi 49,1 paıyzdy qurady.

Aıta keteıik, 2017 jyly oblys ónerkásibi 5% ósip, aqshalaı 1,5 trıllıon teńgege jetken bolatyn.