Aqtóbede munaı-gaz salasyna táýeldilik tómendegen - ákim
Jıynǵa barlyq deńgeıdegi máslıhattardyń depýtattyq fraktsııa jetekshileri men aýdandyq partııa fılıaly tóraǵalarynyń birinshi orynbasarlary, memlekettik mekeme basshylary qatysty. Onda oblystyń damý qarqyny men jumysty kúsheıtý sharalary talqylandy. Aımaq basshysy «Qazaqstan-2021: Birlik. Turaqtylyq. Jasampazdyq» saılaýaldy baǵdarlamasy jáne Aqtóbe oblysyn damytý baǵdarlamasynyń oryndalýyn baıandady.
«2016 jyldan bastap óńirdiń ekonomıkasy 2-den 2,7 trln teńgege deıin, ıaǵnı, 30%-ǵa ósken. Ekonomıkany ártaraptandyrýdyń oń úrdisi belgilenip, oblysta munaı-gaz salasyna táýeldilik tómendegen. Óńdeýshi ónerkásiptiń úlesi 10,8%-dan 13,7%-ǵa deıin, al eńbek ónimdiligi 43%-ǵa artty. Óńirge 1,3 trln teńge ınvestıtsııa tartyldy. Bıyl qosymsha 600 mlrd teńgege jýyq ınvestıtsııa salynatyn bolady», - dedi Ońdasyn Orazalın.
Óńirde 25 eksportqa baǵyttalǵan kásiporyn jumys istep tur. Bul shıkizat emes, óńdeý salasynyń kórsetkishi. Baǵdarlama júzege asyrylǵannan bastap 72 myń jumys orny ashylsa, onyń 70 paıyzy turaqty. Aýyl sharýashylyǵy ónimderiniń de kólemi artyp, 2015 jylmen salystyrǵanda 120% artqan.
Halyqty taza aýyz sýmen qamtamasyz etý úshin osy jyly 3,6 mlrd teńge bólindi. Bıyl oblys turǵyndarynyń 89,4% gazben qamtamasyz etiledi. Bul respýblıka boıynsha jaqsy kórsetkish. Úkimettiń qoldaýymen jaqynda gazben jabdyqtaýǵa qosymsha 2,5 mlrd teńge bólindi. Jobalar Áıteke bı, Alǵa, Yrǵyz, Qobda, Temir, Baıǵanın aýdandarynda iske asyrylyp jatyr.
Óńirde 40-tan astam mektep salyndy. Jyl sońyna deıin 5 mektep paıdalanýǵa berilmek. Jıynda ekonomıka jáne bıýdjettik josparlaý basqarmasynyń basshysy Gúlqasıma Súıintaeva «2020-2022 jyldarǵa arnalǵan oblystyq bıýdjet jobasyn» tanystyrdy. Ol bıýdjetti qalyptastyrý kezinde negizgi maqsat áleýmettik turaqtylyqty qamtamasyz etý, azamattardyń áleýmettik qorǵalýyn odan ári arttyrý bastamalaryn iske asyrýǵa basymdyq berilgenin atap ótti.
Jıyn barysynda depýtattar aýyz sý, mektep salý máselesine qatysty saýaldaryna naqty jaýap aldy.