Aqtóbede muqtaj otbasylar úshin jaldamaly úı salýǵa 2,7 mlrd teńge jumsalady

AQTÓBE. QazAqparat - Aqtóbede kópbalaly, muqtaj otbasylardy baspanamen qamtamasyz etý úshin birneshe baǵdarlamamen turǵyn úı salynady, dep habarlaıdy QazAqparat tilshisi.

Óńirlik kommýnıkatsııalar qyzmetinde turǵyn úımen qamtamasyz etý josparymen bólisken Aqtóbe oblystyq qurylys, sáýlet jáne qala qurylysy basqarmasynyń basshysy Nurlan Imanalın «Nurly jer», «Baqytty otbasy» baǵdarlamalary týraly aıtyp berdi.
Máselen, Aqtóbede «Nurly jer» baǵdarlamasy aıasynda áleýmettik jaǵynan az qamtylǵan otbasylar úshin satyp alý quqyǵynsyz jalǵa beriletin turǵyn úı salynady. Bıyl respýblıkalyq bıýdjetten aqsha bólinip, 377 páter paıdalanýǵa beriledi. Baspana Mártók, Hromtaý aýdandary men Aqtóbe qalasynan salynady. Jaldamaly turǵyn úı qurylysyna 1,5 mıllıard teńge bólindi.

«Halyqtyń áleýmettik jaǵynan az qamtylǵan tobyn baspanamen qamtamasyz etý tapsyrmasy boıynsha Ulttyq qordan qarjy bólinedi. Aqtóbe oblysynda jaldamaly turǵyn úı qurylysyn júrgizýge 2,7 mıllıard teńge bólý kózdeldi. 335 páter Aqtóbe qalasy men Alǵa, Temir, Qobda, Muǵaljar, Baıǵanın, Shalqar aýdandarynda bolady. Bul jerlerde jalǵa beriletin turǵyn úı salynady. 60 paıyzy kópbalaly analarǵa, múgedek balany asyryp otyrǵan otbasyǵa, jalǵyzbasty analarǵa bólinedi», - dedi Aqtóbe oblystyq qurylys, sáýlet jáne qala qurylysy basqarmasynyń basshysy Nurlan Imanalın.

Buǵan deıin habarlaǵanymyzdaı, óńirde «Baqytty otbasy» baǵdarlamasy aıasynda da turǵyn úı salynady.