Aqtóbede muqtaj otbasylarǵa berilgen páter ishi káriz sýyna tolyp qaldy

<p>AQTÓBE. KAZINFORM &ndash; Baıǵanın aýdanynyń turǵyny Baqyt Beknııazova úsh jyl buryn memleketten jaldamaly úı alǵan edi. Alaıda onyń bul qýanyshy uzaqqa barmady. Páterge kirisimen ájethanasy káriz sýyna tola bastady. Másele áli kúnge deıin sheshilmegen.</p>

B.Beknııazovanyń aıtýynsha, Baıǵanın aýdany Aeroport kóshesindegi eki qabatty úı osydan úsh jyl buryn paıdalanýǵa berilgen.

Foto: jergilikti turǵyndardan

-Úı ishindegi ájethanany káriz sý basqan. Súrtip, keptirip qoıamyn, qaıta tolyp qalady. Keıin ákimdikke baryp kómek suradym. Olar káriz qubyry bitelip qalǵanyn aıtady. Biraq qazir las sý qubyrdan ǵana emes, edendegi qysh taqtaıshalarynyń arasynan da kirip jatyr. Bizge kómek kerek,- dedi aýyl turǵyny Baqyt Beknııazov.

Dál osy úıdiń turǵyny Gúlzat Esenbaeva da úıdiń sapasyna kóńili tolmaıtynyn aıtty. Terezesinen jel soǵatyn bolǵan soń amaldap, skochpen bitep qoıǵan. Sonymen birge qabyrǵasynda jaryq baryn aıtty.

Turǵyndar jibergen vıdeodan páter ishinen bólek ortaq dálizge de káriz sýy kirip jatqanyn kórýge bolady. Bul bir ǵana otbasynyń emes, birinshi qabattaǵy turǵyndardyń ortaq problemasy. Olardyń oıynsha, jerastynda qubyr jarylǵan bolýy múmkin.

Bul máselege Baıǵanın aýdandyq ákimdigi óz jaýabyn berdi. Ákimdik turǵyndardyń ózine kiná artyp otyr.

-Bul úı 2021 jyly osal toptaǵy adamdarǵa paıdalanýǵa berildi. Úıdiń káriz qubyry bitelip qala beredi. 13 ret biteldi. Qubyr bitelgen saıyn tirkep otyramyz. Іshinen kartoptyń qabyǵy, shúberekterge deıin shyǵady. Turǵyndardyń eshqaısysy moınyna almady.

Munda 16 páter bar. Árqaısysymen jeke-jeke jınalys ótkizildi. Esh nátıje bermeı otyr. Janynda ózge de eki qabatty úıler bar. Olarda eshqandaı másele joq, problema tek osy úıde bolyp tur. Kárizden tipti balalardyń jórgekterine deıin tabylady. Sý sorǵanda ol isinip ketip, bitep tastaıtyny anyq. Qasaqana jasaı ma, bilmeımin.

31 jeltoqsan kúni bári Jańa jyldy toılap jatqanda baryp, keshke deıin 30 metr trostpen tazarttyq. 4-qańtardan keıin taǵy aıtyp jatyr. Kelisimshart boıynsha adamdar ózderi kútip ustaýy tıis,- dedi Baıǵanın aýdany ákiminiń orynbasary Rústem Raýshanov.

Qazirgi kezde ákimdik turǵyndarǵa habarlama taratty. Kútip ustaý tártibi saqtalmasa kelisimshart buzylýy múmkin. Turǵyndar bolsa káriz sýyn jýyp sharshaǵan.

Aıta keteıik, Muǵaljar aýdanynyń Aqsý jáne Sabyndykól aýyldarynda elektr togy tartylǵan 76 baǵana qulady.