Aqtóbede múgedekterdiń kedergisiz daýys berýi úshin barlyq jaǵdaı jasalady
Aqtóbe qalalyq sal aýrýyna shaldyqqan azamattardy qoldaý ortalyǵynyń jetekshisi, Qazaqstannyń Eńbek Eri Quralaı Baımenova búgin múmkindigi shekteýli azamattardyń kómekshilerin ortalyqqa jınady. Mundaǵy maqsat - el bolashaǵyn aıqyndaıtyn saılaýdan tys qalmaý, daýys berip, tańdaý jasaý.
«Aramyzda arbamen qozǵala alatyndar men tósekke tańylǵandar da bar. Sol tósekke tańylǵandardyń jan-jaqty aqparat alýy úshin búgin kómekshilerin shaqyryp, bul saılaýdyń máni men mańyzyn túsindirdik. Bolashaq prezıdent álemmen tyǵyz baılanys jasap, eldiń damýyna úles qosady dep kútemiz. Halqy prezıdentpen maqtanýy, maqtan tutýy tıis. Osy jolda ár adam saılaý ýchaskesine baryp, tańdaý jasaǵany durys. Men elde bolyp jatqan barlyq saılaýǵa qatystym, tipti tósekke tańylyp jatqan kezde de. Sebebi bul - meniń azamattyq paryzym. Saılaýǵa qatyspaǵan adam bireýdiń isi durys emes dep aıta almaıdy. Tańdaý jasamaǵan adamnyń buǵan quqyǵy joq dep bilemin», - dedi Quralaı Baımenova.
«Aqtóbe oblysynyń múgedekter odaǵy» qoǵamdyq birlestiginiń músheleri Qazaqstan Respýblıkasynyń Prezıdent saılaýyn ótkizý jónindegi sheshimdi tolyqtaı qoldaıdy.
«Prezıdenttikke elimizdiń saıası-ekonomıkalyq, áleýmettik ál-aýqatyn jaqsartýǵa kúsh-jigerimdi aıamaı jumsaımyn, oǵan óz boıyndaǵy bilimim, talabym, iskerligim men saıası dıplomatııaǵa qabilettiligim jetkilikti dep eseptegen azamat óz kandıdatýrasyn usynýǵa quqyly. Eldikti joǵaltpaý tek qana el basqarǵan adamdarǵa ǵana emes, qarapaıym eńbekshi halyqtyń da úlesi bolýynyń kórinisi bolyp tabylatyn saılaýǵa barlyq sanaly, namysty, patrıot adamdar qatysyp, daýys berý óte mańyzdy. Prezıdent saılaýy naýqanynda prezıdenttikke kandıdattardyń barlyǵynyń baǵdarlamasymen tanysyp, laıyqtysyn tańdaý - árbir qazaqstandyqtyń azamattyq boryshy», - deıdi «Aqtóbe oblysynyń múgedekter odaǵy» qoǵamdyq birlestiginiń tóraıymy Gúlmıram Srajova.