Aqtóbede múgedekterdi ońaltý ortalyǵy men stýdentter úıi salynyp jatyr

AQTÓBE. QazAqparat - Aqtóbede mańyzdy eki áleýmettik nysan qurylysy júrip jatyr. Olar múgedek jandarǵa arnalǵan ońaltý ortalyǵy men Stýdentter úıi. Eki qurylysty da oblys ákimi qarap shyqty, dep habarlaıdy QazAqparat tilshisi.

Aqtóbede 150 oryndyq ońaltý ortalyǵy salynyp jatyr. Nysan qalanyń Eset batyr turǵyn úı alabynda turǵyzylmaq. Birneshe ǵımarattan turatyn úlken keshenniń qurylysy jaryn aıaqtalady.

Jobanyń jalpy quny qurylys-montajdaý jumystary men satyp alynatyn jabdyqtardy qosqanda 6,4 mlrd teńgeni quraıdy.

Ortalyqta múgedekterdi ońaltý úshin barlyq jaǵdaı jasalmaq, ıaǵnı, zamanaýı jabdyqtar, basseın jáne basqa jabdyqtar bolady.

Oblys ákimi bul nysandardyń áleýmettik mańyzy zor ekenin atap ótti.

«Nysandar óte mańyzdy jáne bekitilgen merzimde salynýy kerek. Jabdyqtardyń satyp alynýyn aldyn ala qarastyryńyzdar, qymbattap jatyr, sońyna deıin júrip almańyzdar. Biz muqtaj jandarǵa qolaıly jaǵdaı jasaýymyz qajet, ásirese múgedektigi barlarǵa. Jalpy, memleket qarjyny bólip jatyr, qurylys qarqyny jaman emes. Kelesi jyly ońaltý ortalyǵy da, dene shynyqtyrý-saýyqtyrý kesheni de paıdalanýǵa berilýi tıis»,- dedi Ońdasyn Orazalın. ​Aıtyp óteıik, merdiger qalada dene shynyqtyrý-saýyqtyrý ortalyǵyn da salyp jatyr.

Keıin óńir basshysy Stýdentter úıiniń qurylys alańynda bolyp qaıtty.

Joba «Bıznestiń jol kartasy» memlekettik baǵdarlamasy boıynsha jeńildetilgen nesıe arqyly qoldaý tapty. Jalpy quny - 1,2 mlrd teńge.

Stýdentter úıi segiz qabattan turatyn bolady. Munda joǵary oqý oryndary men kolledjderdiń 700 stýdenti jaıǵasady.

Seriktestik dırektory Sáýle Nurbergenovanyń sózinshe, aldaǵy ýaqytta jaldaý quny - aıyna 30 myń teńge.

Sonymen birge stýdentterge tegin tańǵy jáne keshki as berilip, shash qııý men kir jýýý da aqysyz bolady.

Stomotologııaǵa 50 paıyz jeńildik bar.

Oblys ákimi Stýdentter úıi aýmaǵynda qaýipsizdik pen quqyqtyq tártipti qamtamasyz etýge erekshe nazar aýdarýdy tapsyrdy.