Aqtóbede mindetti áleýmettik saqtandyrý júıesiniń jumysy tanystyryldy
Aqtóbege jumys saparymen Densaýlyq saqtaý mınıstrligi zań departamentiniń dırektory Talǵat Turmaǵanbet, respýblıkalyq elektrondyq densaýlyq saqtaý ortalyǵy aqparattandyrý departamenti dırektorynyń orynbasary Manat Ysqaqov, «Mindetti áleýmettik medıtsınalyq saqtandyrý qory» AQ aqparattyq júıelerdi damytý departamentiniń dırektory Aıdar Aıtýev keldi.
Olar №5 qalalyq emhana, M. Ospanov atyndaǵy Batys Qazaqstan medıtsınalyq ýnıversıteti janyndaǵy otbasylyq medıtsına klınıkasy jáne statsıonarlardy aralap, jumys barysymen tanysty. Alǵa, Muǵaljar aýdandaryndaǵy aýrýhana ujymynyń saqtandyrý júıesimen jumysy tekserildi.
«Búgingi kúni medıtsınalyq mekemeler tolyq elektrondyq júıege kóshti, qyzmetter ońtaılandyryldy, elektrondyq kezek iske qosyldy, medıtsınalyq qurylǵylar men jabdyqtar sandyq rejımde jumys istep jatyr» - dep atap ótti respýblıkalyq elektrondyq densaýlyq saqtaý ortalyǵy aqparattandyrý departamenti dırektorynyń orynbasary Manat Ysqaqov.
«Mindetti áleýmettik medıtsınalyq saqtandyrý qory» KEAQ Aqtóbe oblystyq fılıalynyń dırektory Gúlmıra Qojanııazovanyń aıtýynsha, Qordan Alǵa aýdandyq aýrýhanasyna 2020 jylǵa 1 mlrd 275 mln teńge bólindi. Onyń 915 mln teńgesi tegin medıtsınalyq kómektiń kepildendirilgen qyzmetine, 360 mln teńge MÁMS-ke, al Muǵaljar aýdandyq aýrýhanasyna 1 mlrd 150 mln teńge aýdaryldy. Onyń 1 mlrd teńgesi tegin medıtsınalyq kómekke, 150 mln teńge MÁMS-ke jumsalady.
«1 sáýirge deıin qazaqstandyqtar shartty túrde saqtandyrylǵan bolyp esepteledi. Sondyqtan emhanalarda qyzmet bárine tegin kórsetilýde»,- dedi Gúlmıra Qojanııazova.
Aqtóbede mindetti áleýmettik medıtsınalyq saqtandyrý júıesin engizý máseleleri boıynsha aımaqtyq shtab otyrysy ótti. Jıyn barysynda óńirlik shtab júktegen tapsyrmalardyń oryndalý barysy, turǵyndardy aktýalızatsııalaý týraly baıandaldy.
2019 jyldyń 31 jeltoqsanyndaǵy derekke súıensek, Aqtóbe oblysynda 370 824 tutynýshy úshin mindetti áleýmettik medıtsınalyq saqtandyrý qoryna 11 mıllıard 323 mıllıon 774 myń teńgege jarna men tólem aýdaryldy.
Aıta keteıik, Aqtóbe oblysynda bıyl jalpy 848 212 turǵyn mindetti áleýmettik medıtsınalyq saqtandyrý paketine kiretin qyzmetterdi tegin paıdalana alady.
«Osy jyly jeńildigi bar 15 sanatqa jatatyn turǵyndarǵa saqtandyrý paketindegi qyzmetter memleket esebinen kórsetiledi. Bul óńirimizdiń 477 388 turǵynyn qamtıdy», - dep atap ótti Gúlmıra Qojanııazova.