Aqtóbede memlekettik organdar qyzmetkerleri arasynda jemqorlyq qylmystary tómendegen
Aqtóbe oblysynda memlekettik organdardyń qyzmetkerlerimen jasalǵan sybaılas jemqorlyq qylmystarynyń tómendegeni baıqalady. Al, óńirdiń ishki ister organdarynda sybaılas jemqorlyq kórsetkishi sál ósip otyr.
Partııanyń Aqtóbe oblystyq fılıalynda ótken «Amanat» partııasy janyndaǵy Sybaılas jemqorlyqqa qarsy is-qımyl jónindegi respýblıkalyq keńestiń otyrysy barysynda óńirdegi sybaılas jemqorlyqqa qarsy is-qımyl jónindegi sharalar talqylandy, sondaı-aq partııanyń Saılaýaldy baǵdarlamasynyń oryndalý barysy qaraldy.
Keńeske «AMANAT» partııasy janyndaǵy Sybaılas jemqorlyqqa qarsy is-qımyl jónindegi respýblıkalyq keńestiń tóraǵasy Erlan Saıyrov, «AMANAT» partııasynyń hatshysy Erjan Jylqybaev, Aqtóbe oblysynyń ákimi Ashat Shaharov, keńes músheleri, óńirdiń Sybaılas jemqorlyqqa qarsy qyzmeti jáne quqyqqorǵaý organdarynyń ókilderi qatysty.
Jıynǵa tóraǵalyq etken «AMANAT» partııasy janyndaǵy Sybaılas jemqorlyqqa qarsy is-qımyl jónindegi respýblıkalyq qoǵamdyq keńestiń tóraǵasy Erlan Saıyrov árbir azamat eliniń patrıoty bolyp, sybaılas jemqorlyqpen kúresý qajet ekenin aıtty.
«QR Prezıdenti Qasym Jomart Toqaev qoǵamdaǵy barlyq keleńsizdikterdi sheshý úshin ózimizdiń jurtshylyqpen, azamattarmen birge jumys isteý qajet ekenin aıtqan bolatyn. Endeshe memlekettiń isine aralasý úshin, patrıot bolý úshin eshqandaı memlekettik qyzmetker bolýdyń qajet joq. Máselen Frantsııada frantsýz revolıýtsııasy bolǵan kezde eń birinshi patrıot degen uǵym paıda boldy. Bul uǵym halyq úshin qyzmet etetin azamat degendi bildiredi. Sondyqtan da ózimizdiń azamattarymyz, bala-shaǵamyz uly qoǵamda ómir súrsin desek, onyń fýndamentin búginnen bastaǵanymyz durys. Elimizdegi kemshilikterdi jasyrmaýymyz kerek, biraq kemshilikti joıý úshin árqaısysymyz qyzmet etýimiz kerek», — dedi ol.
Óz kezeginde oblys ákimi Ashat Shaharov óńirde sybaılas jemqorlyqqa qarsy is-qımyl jáne qylmystardyń aldyn alý boıynsha júıeli jumystar júrgizilip jatqanyn atap ótti. Sybaılas jemqorlyqqa qarsy is-qımyl jónindegi oblystyq komıssııanyń 42 otyrysy ótkizildi, 108 másele talqylandy. 350 tapsyrmanyń 250-i oryndaldy, qalǵandary — oryndalý satysynda.
«Jyl saıyn memlekettik organdarda sybaılas jemqorlyq táýekelderine ishki jáne syrtqy taldaý júrgiziledi. Osy jyldyń toǵyz aıynda sybaılas jemqorlyq táýekelderi anyqtalyp, olardy joıý boıynsha 300-den astam is-shara ótkizildi. Іshki aýdıt qyzmeti tekserý júrgizip, buzýshylyqtardy anyqtady. Tórt materıal quqyqqorǵaý organdaryna jiberildi. Alty laýazymdy tulǵaǵa qatysty tıisti sharalar qabyldandy. Memlekettik qyzmetshilerdi qaıta daıarlaý jáne olardyń biliktiligin arttyrýǵa qatysty jumystar uıymdastyryldy. 2024 jyly 27 adam sondaı kýrstan ótti. Jalpy sybaılas jemqorlyqqa qarsy mádenıetti nasıhattaý boıynsha 7250-den astam is-shara ótkizildi. Partııanyń jol kartasy aıasynda sybaılas jemqorlyqqa qarsy sharalar boıynsha 122 is-shara ótkiziledi. Jol kartasyn iske asyrý — turaqty baqylaýda», — dedi Ashat Shaharov.
«AMANAT» partııasy janyndaǵy sybaılas jemqorlyqqa qarsy is-qımyl jónindegi respýblıkalyq keńestiń múshesi Abzal Quspan toǵyz aıdyń qorytyndysyna toqtalyp, quqyqqorǵaý organdary, sondaı-aq qurylys, TÚKSh, jer qatynastary salalaryndaǵy problemalyq máselelerdi atap ótti. Esepti kezeńde 46 sybaılas jemqorlyqqa qarsy quqyqbuzýshylyq tirkeldi. Byltyr 58 jaǵdaı bolypty. Baıandamashy byltyrǵy jylmen salystyrǵanda oblysta memlekettik qyzmetshiler arasynda sybaılas jemqorlyq qylmystarynyń tómendeýi baıqalǵanyn (2022 j — 8, 2023 j — 17, 2024 j — 6), al quqyqqorǵaý júıesiniń qyzmetkerleri arasynda ósim sál óskenin alǵa tartty (2022 j — 7, 2023 j — 3, 2024 j — 4).
Keńes barysynda «AMANAT» partııasynyń saılaýaldy baǵdarlamasynyń Jol kartasyn iske asyrý máseleleri qaraldy.
Respýblıkalyq keńes tóraǵasy Erlan Saıyrov sybaılas jemqorlyq kórinisterine jol bergeni úshin, sondaı-aq sybaılas jemqorlyqqa qarsy jumysty júrgizýge, partııanyń Saılaýaldy baǵdarlamasyn iske asyrý boıynsha Jol kartalaryn oryndaýǵa formaldy kózqaras tanytqany úshin birqatar laýazymdy tulǵany partııalyq jaýapkershilikke tartýdy usyndy.
Buǵan deıin Aqtóbe oblysynda 43 merdiger uıym joldardy qysqy kútip ustaýǵa jaýapty ekeni aıtyldy.