Aqtóbede memlekettik mektepterdiń 20 paıyzǵa jýyǵynda sport zaly joq
Aqtóbe oblysynyń bilim salasyndaǵy sapany qamtamasyz etý departamenti jańa oqý jyly qarsańynda monıtorıng júrgizip, qorytyndysyn shyǵardy.
Onda kúrdeli jóndeý júrgizilgen mektepter men eski bilim ordalaryndaǵy kemshilikter qaıta kóterildi.
Qazirgi kezde Aqtóbe oblysy boıynsha barlyǵy 410 memlekettik mektep bar. Onyń teń jartysynan astamynda ákteý, syrlaý sekildi kishigirim jóndeý júrgizilgen.
Al shaǵyn jóndeý tamyz aıynyń sońyna deıin jalǵasady. Kúrdeli jóndeý jumystary júrgizilip jatqan 25 mekteptegi jaǵdaı ózge.
Onyń 12-indegi jumys qyrkúıekte aıaqtalmaýy múmkin.
«Bekitilgen jospar boıynsha kúrdeli jóndeý jumysyn 13 mektepte 1 qyrkúıekke deıin, 12 mektepte 1 qyrkúıekten keıin aıaqtaý josparlanǵan. Eger jóndeý qyrkúıekte aıaqtalmasa, oqý-tárbıe protsesin uıymdastyrý úshin ýaqytsha ornalasý oryndary belgilendi. Olar: Aqtóbe qalasy Sazdy orta mektebi, M. Qusaıynov atyndaǵy daryndy balalarǵa arnalǵan oblystyq mamandyrylǵan mektep-ınternaty, Qobda aýdanyndaǵy Jırenqopa orta mektebi, I.Taımanov atyndaǵy mektep-gımnazııa, Shalqar aýdanyndaǵy Úrgenishpaev jáne Á. Jangeldın atyndaǵy orta mektepter, Áıteke bı aýdany Enbektý negizgi mektebi. Biz merdigerlermen kezdesip, qyrkúıekke deıin aıaqtaý úshin jumysshy sanyn kóbeıtý keregin aıttyq. Atalǵan jóndeý jumystarynyń ýaqytyly aıaqtalýy mınıstirlik jáne jergilikti atqarýshy organ tarypanan turaqty baqylaýǵa qoıylǵan»,- dedi Aqtóbe oblysynyń bilim salasyndaǵy sapany qamtamasyz etý departamentiniń basshysy Gúlnara Sársenǵalıeva.
Statıstıka súıensek, oblys mektepteriniń 40,3 paıyzyna, ıaǵnı, 165-ine kúrdeli jóndeý qajet. Oblystyń 77 mektebinde sport zaly joq. Al 74-inde sport ınventarlary jetkiliksiz.
«Sport quraldary Yrǵyz aýdanynyń 47,6%, Muǵaljar aýdanynyń 37,8%, Áıteke bı aýdanynyń 36,7% mektepterine qajet. ıAǵnı, sport quraldarynyń tozyǵy jetken, mektep janyndaǵy sport alańynyń qorshaýyn aýystyrý kerek. Monıtorıng barysynda ashana bólmesimen qamtylmaǵan 37 mektep anyqtaldy,. Onda 362 oqýshy bekitilgen kategorııalar boıynsha tegin tamaqpen qamtylýy tıis. Sondaı-aq bilim ordalarynyń 29,8 paıyzynyń jylý qazandyǵy jóndeý jumystaryn qajet etedi. Oblys mektepteri tolyq jyly dárethanamen qamtylǵan, qajetti qural-jabdyqtarmen jabdyqtalǵan. Alaıda Mártók aýdany Egizata negizgi mektebi, Dmıtrıevskaıa negizgi mektebi, Qobda aýdany Aqsaı bastaýysh mektebi bıotýalet qoldanady. Sondaı-aq keıbir mektepterde daladaǵy dárethana da paıdalanylatyny anyqtaldy»,- dedi Gúlnara Sársenǵalıeva.
Onyń sózinshe, oblys mektepteriniń 58% jańa úlgidegi fızıka kabınetimen, 52,3% hımııa, 54,3% bıologııa kabınetimen jabdyqtalǵan.
Al barlyq memlekettik bilim oshaǵynyń 86 paıyzy ınteraktıvti taqtamen qamtylǵan. Jalpy 2030 ınteraktıvti taqta bolsa, onyń 83 paıyzy jumys istep tur.
«Monıtorıng barysynda 39 mektepte dabyl túımesi bolmady. Nusqaýlyq boıynsha oqýshy sany 300-den joǵary bolsa, qondyrylýy tıis. Negizi oblysta barlyq mektepte beınebaqylaý júıesi ornatylǵan. Alaıda 6 mektepte beınebaqylaý kameralary obektige irgeles aýmaqtyń perımetrin kórsete almaıdy. Olar Muǵaljar aýdanyndaǵy Bulaq negizgi mektebi, Sabyndykól bastaýysh mektebi, Qaıyńdy orta mektebi, Aşysaı negizgi mektebi, Altyndy orta mektebi, Temir aýdanynyń Altyqarasý mektep-balabaqshasy. Talap boıynsha beınebaqylaý jazbalaryn aqparattyq saqtaý merzimi 30 táýlik. Aımaqtaǵy 44 mektepte bul talap saqtalmaıdy»,- dedi Aqtóbe oblysynyń bilim salasyndaǵy sapany qamtamasyz etý departamentiniń basshysy Gúlnara Sársenǵalıeva.
Departament tamyz aıynyń sońynda taǵy da monıtorıng júrgizedi.