Aqtóbede memlekettik qyzmetshilerdiń jumystan shyǵý sebepteri taldanady
Jıynda memlekettik qyzmetkerlerdiń etıkasy, aqparattyq qaýipsizdik, qyzmetkerlerdiń aýysý máselesi qaraldy. Oǵan Memlekettik qyzmet jáne sybaılas jemqorlyqqa qarsy is-qımyl agenttigi Aqtóbe oblysy boıynsha departamenti basshysynyń mindetin atqarýshy Baýyrjan Orazov, aýdandyq ákimdikterdiń apparat basshylary beınebaılanys arqyly qatysty.
Aqtóbe oblysy ákimi apparatynyń aqparattyq qaýipsizdik boıynsha bas ınspektory Shyńǵys Nurjigit aqparattyq qaýipsizdik máselesine toqtaldy. Al personaldy basqarý biryńǵaı qyzmetiniń basshysy Mırhan Ermaǵanbetovtiń aıtýynsha, bıyl oblysta 112 memlekettik qyzmetshi jumys oryndaryn aýystyrǵan. Bul kórsetkish 2018 jylmen salystyrǵanda 0,1% kóbeıdi. Keıbir qala, aýdandarda taza aýysym kórsetkishi jyl basynda bekitilgen shekti mánnen artqan. Oblys ákiminiń apparat basshysy Nurjaýǵan Qalaýov memlekettik qyzmetshilerdiń jumystan ne sebepti ketkenine taldaý jasaýǵa, óz erkimen jumystan shyqqandar arasynda saýalnama júrgizýge tapsyrma berdi.
«Sebepsizden sebepsiz qyzmetten ketý máselesine toqtaý salý qajet. Bos oryndar sany 132 bolyp tur. Biz osy oryndardyń ornyn toltyra almaı jatqanda, ekinshi jaqtan sebepsiz jumystan bosap jatady», - dedi apparat basshysy N. Qalaýov.
Óńirde «E-Qyzmet» aqparattyq júıesi qoldanysynyń deńgeıi de kóńil kónshitpeıdi. Taldaý qorytyndysy memlekettik organdardyń júıedegi belsendiliginiń óte tómen ekendigi anyqtalǵan. Máselen, elektrondy-tsıfrlyq qoltańba qoıý arqyly 26 443 qujattyń nebári 1293 nemese 4,9% ázirlengen. Jyl basynan beri «E-Qyzmet» aqparattyq júıesine 18 776 qujat engizilgen.
Sonymen qatar, oblys ákimdiginiń saıttary men áleýmettik jeli paraqshalaryna turǵyndar tarapynan keletin aryzdar men hattarǵa berilgen memlekettik organ jaýaptarynyń sapasyn qatań synǵa aldy. Sebebi suraqqa naqty jaýap berýdiń ornyna uzaq tarmaqshalardan turatyn zańdardy kórsetip, qarapaıym azamattarǵa túsiniksiz jaýap qaıtarylady.
«Budan bylaı azamattardyń hatyna beriletin jaýap tikeleı ákimdik apparatynyń tekserýinen soń ǵana jarııalanatyn bolady. Hat jaýaby qarapaıym, túsinikti túrde jazylýy qajet», - dedi Nurjaýǵan Qalaýov.