Aqtóbede memlekettik qyzmetshi alaıaqtyq áreketke barǵany úshin sottaldy
Ol áriptesteriniń jalaqysy men issaparǵa bólingen aqshany jymqyryp, memlekettik satyp alý kelisimshartyn zańsyz jasaǵany úshin aıyptaldy, dep habarlaıdy QazAqparat tilshisi.
Іs Temir aýdandyq sotynda qaraldy. Aqtóbe oblysy Temir aýdany Aqsaı aýyldyq okrýgi ákimi apparatynyń bas mamanyna Qylmystyq kodekstiń «Alaıaqtyq» baby boıynsha aıyp taǵyldy.
Іs materıalyna súıensek, sottalýshy 2020 jyldyń sáýirinen 2022 jyldyń qazan aıy aralyǵynda deıin memlekettik fýnktsııalardy oryndaýǵa ýákilettik berilgen adamǵa teńestirilgen. Sóıtip Aqsaı aýyldyq okrýgi ákiminiń elektrondy-tsıfrlyq qoltańbasyn paıdalanyp, ákimdik qyzmetkerleriniń jalaqysyna jáne is-saparyna bólingen 3, 2 mln teńgeni jymqyrǵan. Odan ári 2022 jyldyń qańtar men jeltoqsan aılary aralyǵynda Aqsaı aýyldyq okrýgi ákiminiń apparaty men jeke seriktestik arasynda 27, jeke kásipkermen 4 memlekettik satyp alý týraly kelisimsharttardy jasaıdy. Shyǵyn - 11,5 mln teńge. Bárin qosa eseptegende memleketke 14,7 teńge zalal keltirgen.
Sot otyrysynda sottalýshy kinásin tolyq moıyndady. Prokýror sottalýshyǵa 5 jyl merzimge bas bostandyǵynan aıyrý túrindegi jaza taǵaıyndaýdy surady.
«Sottyń úkimimen memlekettik qyzmetker kináli dep tanylyp, oǵan belgili laýazymdardy atqarý quqyǵynan ómir boıyna aıyra otyryp, 4 jyl merzimine bas bostandyǵynan aıyrý jazasy taǵaıyndaldy. Jazany óteý orny bolyp qylmystyq-atqarý júıesiniń ortasha qaýipsizdik mekemesi taǵaıyndaldy. Sottalýshydan memleket paıdasyna 14 787 517 teńge shyǵyn óndirildi»,-dep habarlady Temir aýdandyq sotynyń baspasóz qyzmeti.
Sot úkimi zańdy kúshine engen joq.
Sonymen qatar, memlekettik qyzmetker jol bergen zań buzýshylyqqa Temir aýdandyq ákiminiń nazaryn aýdarýǵa jekeshe qaýly shyǵaryldy.