Aqtóbede memlekettik qyzmetkerler arasynda toǵyzqumalaqtan jarys ótti

NUR-SULTAN. QazAqparat - Ulystyń Uly kúni — Naýryz merekesi qarsańynda Aqtóbe, Mańǵystaý, Batys Qazaqstan jáne Atyraý oblysynyń memlekettik qyzmetkerleri arasynda toǵyzqumalaq oıynynan onlaın-týrnır ótti.

Bul týraly QazAqparat QR Memlekettik qyzmet isteri agenttiginiń Aqtóbe oblysy boıynsha departamentiniń baspasóz qyzmetine silteme jasap habarlaıdy.

Baspasóz qyzmetiniń derekteri boıynsha, týrnırdiń maqsaty memlekettik qyzmet salasynda ulttyq zııatkerlik oıynymyzdy damytyp, tanymal etý.

Búginde memlekettik qyzmetkerler arasynda atalǵan ulttyq sport túrinen saıys uıymdastyrý úrdiske aınalǵan. Bul joly týrnır Aqtóbe oblysynyń zııatkerlik toǵyzqumalaq qaýymdastyǵy men dene shynyqtyrý jáne sport basqarmasymen birlese uıymdastyryldy.

Týrnırge ár óńirden 3 er jáne 3 áıel adam jalpy sany 24 memlekettik qyzmetker qatysty. Onlaın-týrnır naýryz aıynyń 18 kúni ótti.

Jarys qorytyndysy boıynsha erler arasynda Atyraý oblysynan Asqar Aqtaev jeńse, áıelder arasynda Aqnur Aıazbaıqyzy jeńimpaz atandy. Ekinshi oryndy Táttimbet Daýylbaev (Atyraý oblysy) men Saltanat Elýbaeva (BQO) bólisse, júldeli úshinshi oryn Erlan Altybaev (Aqtóbe oblysy) pen Aıdana Qadyrǵalıevaǵa (BQO) buıyrdy. Jalpy komandalyq esepte Atyraý oblysynyń qyzmetkerleri úzdik atandy.

Jeńimpazdar Toǵyzqumalaq qaýymdastyǵy Prezıdentiniń dıplomymen, medaldarmen jáne komandalyq kýboktarmen marapattaldy.
Táýelsizdik alǵannan beri toǵyzqumalaq oıyny keńinen taralýda.

Týrnır jeńimpazy A.Aqtaevtyń aıtýynsha, toǵyzqumalaq oıyny logıkalyq oılaý qabiletin shyǵdap, tabandylyqpen qatar, memlekettik qyzmette qoldanylatyn basqa da negizgi qasıetterdi damytýǵa múmkindik beredi.