Aqtóbede mektep qarjysyn jymqyrǵan lýdoman esepshiniń isi sotta qaralýda

<p>AQTÓBE. KAZINFORM &ndash; Aqtóbe qalasyndaǵy mektepterdiń birinde esepshi bolyp jumys istegen sottalýshy 2015-2023 jyldar aralyǵynda memleketke 413 mln teńgeden astam shyǵyn keltirdi. Ol ózine artyq aqsha aýdaryp, teń jartysynan astamyn bás tigýge jumsaǵan.</p>

Aqtóbe qalasyndaǵy №2 sotta mektep esepshisiniń isi qaralyp jatyr. Oǵan Qylmystyq kodekstiń «Senip tapsyrylǵan bóten múlikti ıemdenip alý nemese talan-tarajǵa salý» baby boıynsha aıyp taǵyldy. 30 jastaǵy sottalýshy 2015 jyldyń naýryz aıynda jumysqa qabyldanyp, sol sátte-aq ózine jalaqyny artyǵymen aýdarýǵa kirisken. Ol úshin mektep dırektorynyń ETsQ paıdalanǵan. Alǵashqy aıda 60 myń teńge aýdaryp, keıin jyl saıyn ósirip, ony báske tikken, jeke maqsatyna jumsaǵan. 

– Ol esh sebepsiz esepshotyna aqsha aýdarsa jazalanatynyn, kúdik týdyratynyn bildi. Sondyqtan ol aqshany az-azdan, jalaqy retinde aýdarýdy jón sanady. 2015 jyldyń maýsym-jeltoqsan aılary arasynda jalaqy dep negizsiz 641 482 teńge aýdarady. Aqshany alyp, óz maqsatyna paıdalanady. 2016 jyldyń 1 aqpanynan bastap 23 sáýiri aralyǵynda 967 789 teńge aýdaryldy. Sol jyldyń mamyr aıynda esh kúdik týdyrmaǵanyn bilip alyp, «mektepke qajet» dep qarjylandyrý kólemin ósirýge suranys túseredi. Keıin dırektorǵa aparyp, qol qoıdyryp alady. Qalalyq bilim bólimi esh kúdiktenbegenin anyq uǵynyp, jyl sońyna deıin mektepti qarjylandyrýdy 34 893 900 teńgege ulǵaıtyp, mamyr-jeltoqsan aılary aralyǵynda ózine 4 993 636 teńge aýdarady, - dedi prokýror Eldar Abıev.

Aıyptaý aktisine súıensek, 2017 jyly aýdıttik tekserý kezinde zańsyzdyq anyqtalmady. Sondyqtan mektep esepshisi bıýdjet aqshasyn ıemdenýdi ári qaraı jalǵastyrady. Sóıtip 2015-2023 jyldary aralyǵynda jalpy somasy 413 822 951 teńge shyǵyn keltirdi. Onyń 265 440 768 teńgesine bás tigip, ózgesin jeke qajettiligine jaratady.

Sot otyrysy jalǵasyp jatyr.