Aqtóbede mektep dırektory para aldy degen kúdikpen ustaldy
Shalqar aýdanyndaǵy №6 mektep dırektorynyń isi sotqa túsken. Oblystyq sot baspasóz qyzmetiniń habarlaýynsha, is Qylmystyq kodekstiń «Para alý» babymen qaralady. Oǵan 600 myń teńge para aldy degen aıyp taǵylyp otyr.
Aqtóbe oblystyq bilim basqarmasy basshysynyń mindetin atqarýshy Nurgúl Bertileýovanyń aıtýynsha, dırektor áýeli jumystan shettetilgen. Al, qyzmettik tekserýden soń ornynan bosatylǵan.
Sot kabınetindegi aqparatqa súıensek, Qylmystyq kodekstiń 366-baby 2-bóligimen sotqa berilgen Jańabaı Aqmyrzauly Mýsın jónindegi qylmystyq quqyqbuzýshylyq týraly istiń basty talqylaýy 27 aqpan kúni elektrondy formatta júrgiziledi. Sottalýshy J. Mýsınge qoldanylǵan «eshqaıda ketpeý jáne tıisti minez-qulyq túrinde» bultartpaý sharasy ózgerissiz qaldyryldy. Basty sot talqylaýy prokýrordyń jáne qorǵaýshynyń qatysýymen ashyq sot otyrysynda qysqartylǵan tártippen qaralady. Sottalýshy jeke qorǵaýshy jaldaǵan.
Aıta keteıik, mektep dırektory Qylmystyq kodekstiń 366-baby 2-bóligi boıynsha aıypty dep tanylsa, múlki tárkilenip, belgili bir laýazymdardy atqarý nemese belgili bir qyzmetpen aınalysý quqyǵynan ómir boıyna aırylady. Paranyń elý eselengennen alpys eselengenge deıingi somasy mólsherinde aıyppul salýǵa ne úsh jyldan jeti jylǵa deıingi merzimge bas bostandyǵynan aıyrýǵa jazalanady.