Aqtóbede mektep avtobýsynan tútin shyǵyp, oqýshylar evakýatsııalandy
Aqtóbe qalasyndaǵy №18 orta mekteptiń oqýshylar tasymaldaıtyn avtobýsynan tútin shyqty. Sol kezde kólik ishinde 33 oqýshy bolǵan.
Olardyń bári tútin shyqqan kezde birden evakýatsııalandy.
«Tútin shyqqan kezde eki órt sóndirgish quraly qoldanyldy. Bári din aman. Al evakýatsııalanǵan balalardyń árqaısysymen psıholog mamandar jumys isteıdi. Jalpy Aqtóbe qalasy №18 orta mektebine 140 bala tasymaldanady. Olardy mektepke Órleý, Aqshat, Aqjar-2 turǵyn úı alaptary jáne Sarbaz, GaýHar baý-baqsha ujymdarynan eki avtobýs jetkizedi. Avtobýstardyń biri jaldaý sharty esebinen balalardy tasymaldasa, ekinshi avtobýs №18 OM balansynda. Tútin shyqqan avtobýstyń tehnıkalyq pasporty bar. Avtobýs 2009 jyly shyqqan. Osy jaǵdaıdan keıin mektep dırektory Serik Toıshymanov pen dırektordyń sharýashylyq jónindegi orynbasary G. Baımaǵanbetovaǵa eskertý berildi», - dep habarlady oblystyq bilim basqarmasy baspasóz qyzmeti.
Qazirgi kezde jańa kelisimshart jasalyp, tasymaldaý úzdiksiz júzege asyrylyp jatyr.
Sonymen birge bıyl osy mektepke 20 orynda avtobýs satyp alynady.
«2021 jyly oblystyq bıýdjetten bilim berý uıymdaryna 16 avtobýs (15 – 23 oryndyq, 1 – 9 oryndyq) satyp alyndy. Onyń ishinde 9-y eskirgen avtobýstardy jańartý úshin bólinse, 7 mektepke jańadan berildi. 16 avtobýstyń 3-i qala mektepterine jetkizildi. 2022 jyly oblys boıynsha 32 avtobýs satyp alý josparlanǵan. Onyń ishinde 23 avtobýs- 20 oryndyq, 9 avtobýs – 40 oryndyq. Satyp alynatyn 32 avtobýstyń 20-sy Aqtóbe qalasynyń jalpy bilim beretin mektepterine arnalǵan», - dep habarlady oblystyq bilim basqarmasy baspasóz qyzmeti. Oqıǵa ornyna órt sóndirýshiler de baryp, avtobýsty qarap shyqty. Onda motordaǵy symdardyń qysqa tuıyqtalýy kezinde ot tutaǵany anyqtalǵan.
Aıta keteıik, oblysta búgin «Avtobýs» jedel aldyn alý is-sharasy bastaldy. Shara aıasynda polıtsııa qyzmetkerleri avtobýs júrgizýshilerin tekseredi.
Jol qozǵalysy erejeleriniń saqtalýyna, kólikti tehnıkalyq baıqaýdan ótkizý tártibine erekshe nazar aýdarylady.