Aqtóbede usaq maldan kúl aýrýy tabyldy

<p>Aqtóbe qalasy Sadovyı turǵyn alabynda qoıdan kúl aýrýy anyqtaldy. Veterınar mamandar karantın jarııalaý úshin jergilikti ákimdikke habar berdi, dep habarlaıdy <a href="https://kaz.inform.kz/" target="_blank" rel="noopener">QazAqparat</a> tilshisi.</p>

Aqtóbe oblystyq veterınarııa basqarmasy basshysynyń orynbasary Berdimurat Bekjanovtyń aıtýynsha, 25 qyrkúıek kúni Sadovyı turǵyn alabynan 2 bas usaq maldyń aýyrǵany týraly habar túsken. 

Qalalyq veterınarııa stansasynyń mamandary qoıdy qarap shyqty.

«Tekserý kezinde shyryshty qabattyń bárinde bóripte anyqtaldy. Sonymen birge qyzýy joǵary bolǵan. Veterınar mamandar aýrý maldan bıosynamalardy alyp, dıagnoz qoıý úshin oblystyq veterınarııalyq zerthanaǵa jiberdi. Tekserý kezinde birden «qoı kúli» dıagnozy qoıylǵan. Arada 4 kún ótkende taldaý synamasynyń nájıjesi shyqty. «Qoı kúli» dıagnozy rastaldy»,- dedi Aqtóbe oblystyq veterınarııa basqarmasy basshysynyń orynbasary Berdimurat Bekjanov. 

Qazirgi kezde qoıdan juqpaly dert anyqtalǵany týraly habarlama Aqtóbe qalasy Almaty aýdanynyń ákimdigine berildi.

Veterınarlar Sadovyı turǵyn alabynda karantın belgileý týraly sheshimin kútip otyr.

Sheshim shyqqan soń «Epızootııaǵa qarsy otrıad» RMK májbúrli vaktsınatsııa, dezınfektsııa jumystaryn júrgizedi.

Al karantın 20 kúnge sozylady.