Aqtóbede mal izdep, adasyp ketken adamdar tabyldy

AQTÓBE. QazAqparat - Aqtóbede malshy Jańa jyl túni joq izdep shyǵyp, úıine oralmaǵan. Ony qutqarýshylar búgin ǵana tapty, dep habarlaıdy QazAqparat tilshisi.

Aqtóbe oblystyq TJD baspasóz qyzmetiniń habarlaýynsha, Yrǵyz jáne Áıteke bı aýdandarynda malshylar joǵalyp, adamdar kómek suraǵan.

«Yrǵyz aýdany Qalybaı aýylyndaǵy sharýa qojalyǵynyń malshysy 31 jeltoqsan kúni mal izdep shyqqan. Sodan qaıta oralmaǵan soń 1 qańtar kúni qutqarýshylarǵa habarlasyp, kómek surady. Іzdeý jumystary jan-jaqty júrgizilip, atty malshy 3 qańtar kúni saǵat 13:10-da Qaraqudyq jerinen tabyldy. Ol Qalybaı aýylyna jetkizildi. Medıtsınalyq kómekti qajet etpedi. Malshy úsh kún dalada qonsa da ózi jylynyp, shaıyn iship, aman qalǵan»,- dep habarlady oblystyq TJD baspasóz qyzmeti.
Sondaı-aq 2-qańtar kúni saǵat 19:40-ta Qarabutaq aýyldyq okrýgi Jarótkel aýylynan 1967 jáne 1985 jyly týǵan eki er adam «Reno Daster» markaly jeńil avtokóligimen mal izdeýge shyǵyp, qaıta oralmaǵan. Aqparat túsken boıda izdeýshiler jedel qutqarýǵa kiristi. Kóligi qazylǵan orǵa túsip ketken adamdar búgin tabyldy.
«Olar Ulǵaısyn aýyly mańynda aman-esen tabyldy. Qutqarýshylar avtokólikti qar qursaýynan shyǵaryp, Qarabutaq aýylyna jetkizdi. Medıtsınalyq kómekti qajet etpedi. Aqtóbe oblysynyń TJD azamattardy alys jolǵa shyqqan kezde daýyldy eskertýlermen tanysýǵa jáne qysta qaýipsizdik erejelerin qatań saqtaýǵa shaqyrady»,- dep habarlady baspasóz qyzmeti.
Oblystyq TJD taǵy da eskertý jarııalady. Túnde oblystyń soltústiginde qar jaýady. Al batysynda, ońtústiginde kóktaıǵaq, soltústiginde, shyǵysynda, ortalyǵynda burqasyn kútiledi. Ońtústik-batystan jel soǵyp, ekpini sekýndyna 15-20 metrge jetedi.