Aqtóbede lýdoman esepshige erik berip qoıǵan mektep dırektory sottaldy

<p>AQTÓBE. KAZINFORM &ndash; Aqtóbe qalasyndaǵy №55 orta mektep-gımnazııasynyń dırektory sottaldy. Ol esepshige elektrondy tsıfrlyq qoltańbasyn berip, muǵalimderge artyq jalaqy aýdaryp otyrǵan. Sot dırektordy 3 jylǵa bas bostandyǵynan aıyrdy.</p>

Aqtóbe qalasynyń № 2 sotynda №55 orta mektep-gımnazııasynyń dırektoryna qatysty is qaraldy. Oǵan Qylmystyq kodekstiń «Senip tapsyrylǵan bóten múlikti ıemdenip alý nemese talan-tarajǵa salý», «Laýazymdyq ókilettikterdi teris paıdalaný» baptary boıynsha aıyp taǵyldy. Іs materıalyna súıensek, mektep esepshisi 2015-2023 jyldar aralyǵynda memleketke 413 mln teńgeden astam shyǵyn keltirdi. Ol qarjyǵa bás tigip, utylyp qalǵan. 

Sonymen birge mektep dırektory keıbir muǵalimge 0,5 mólsherleme boıynsha qosymsha jalaqyny negizsiz esepteýge kelisim berip, ony ózi alyp otyrǵan. 

- Sot otyrysynda sottalýshy óz kinásin tolyq moıyndamady. Onyń ETsQ kilti únemi bas esepshide boldy jáne onyń urlyq jasaǵanyn bilmedi. Sonymen birge keıbir muǵalimge negizsiz jalaqy tólegenin, biraq paıdakúnemdik maqsatta emes, alǵan barlyq qarajaty mekteptiń qajettilikteri men kútimine jumsalǵanyn aıtyp túsindirdi. Ózin aqtaýdy ótindi. Sot úkimimen mektep dırektoryna 3 jyl merzimge bas bostandyǵynana aıyrý jazasy taǵaıyndaldy. Memlekettik qyzmette laýazymdardy atqarý quqyǵynan ómir boıyna aıyrylady. Sot úkimi zańdy kúshine engen joq, - dedi Aqtóbe qalasy №2 sotynyń baspasóz qyzmeti.