Aqtóbede lańkestermen qaqtyǵysta qaza tapqandarǵa arnalǵan «Máńgilik sapta» taqtasy ashyldy
Búgin Aqtóbedegi №6655 áskerı bóliminde ótken jyldyń 5 maýsymy kúni qaza bolǵandardy eske alý, erlikke taǵzym etý jıyny ótti. Áskerı qyzmetkerlerdiń erligi men rýhyna taǵzym etý sharasyna oblys ákimi Berdibek Saparbaev, QR Ulttyq ulan Bas qolbasshysynyń tárbıe jáne áleýmettik-quqyqtyq jumystar jónindegi orynbasary Muhammetqalı Satov qatysty. Sonymen qatar, qaza bolǵan maıor Danıel Maılybaev, serjant Berik Qalıev pen qatardaǵy jaýynger Dosbol Saparovtyń ata-analary, baýyrlary qatysty.
«Bir jyl buryn kenetten qaıǵyly oqıǵa boldy. Sol oqıǵa kezinde aqtóbelikterdiń tynyshtyǵy, qaýipsizdigi úshin bizdiń áskerı qyzmetkerler óz ómirlerin qıdy. Árıne, ol kez biz úshin ońaı bolǵan joq. Quqyq qorǵaý qyzmetkerleri jumysynyń nátıjesinde tıisti shara qoldanylyp, olar jazalaryn aldy. Mindetimiz - sol oqıǵanyń qaıtalanýyna jol bermeý. Halyq qaýipsizdigin qamtamasyz etý úshin sharalar júrgizildi, júre beredi. Erlik kórsetken áskerı azamattardy eshqashan umytpaıyz», - dedi oblys ákimi Berdibek Saparbaev.
Eske alý sharasy kezinde jınalǵandar memorıaldyq taqtaǵa gúl qoıyp, bir mınýt únsizdik jarııalandy.
«Beıbitshilik pen tynyshtyqty saqtap, qorǵaý kerek. Bir jyl buryn 17 terrorshy áskerı bólimge shabýyl jasaǵan bolatyn. Sol kezde olarǵa qarsy turǵan maıor Maılybaev, jaýynger Dosbol Sapar, serjant Berik Qalıev pen áskerı azamattar edi. Olar kimder? Olar qazaq batyrlarynyń urpaqtary. Olar halyqtyń, eldiń aldynda áskerı mindetin oryndaǵandar. Rahmet aıtamyz. Otandy, eldi, jerdi qazir de qorǵaýymyz kerek. Batyrlarymyzdy eshqashan umytpaımyz, olar bizde máńgilik sapta turady», - dedi QR Ulttyq ulan Bas qolbasshysynyń tárbıe jáne áleýmettik-quqyqtyq jumystar jónindegi orynbasary Muhammetqalı Satov.