Aqtóbede qutyrǵan túlki aýyl turǵynyn talap, eldi mekenge karantın engizildi

ASTANA. QazAqparat – Aqtóbe oblysynyń Qobda aýdanyna qarasty Jamankól aýylynyń turǵynyn qutyrǵan túlki talady, dep habarlaıdy QazAqparat tilshisi.

«Vırýsologııalyq qutyrýǵa tapsyrylǵan mı synamasynyń IFA, DPR, bıosynamanyń bakterıologııalyq zertteýler qorytyndysy boıynsha oń nátıje kórsetýine baılanysty Qobda aýdany Jaryq aýyldyq okrýgi Jamankól aýylynyń «Er-Temir» sharýa qojalyǵynyń aýmaǵynda shekteý is-sharalary belgilensin», - delingen Ashyq NQA portalynda jarııalanǵan Jaryq aýyldyq okrýginiń ákimi E.Imangazınniń sheshiminde.

Qujatta kórsetilgendeı, atalǵan aýyl turǵynyn sý jaǵasynda júrgen kezde qutyrǵan túlki qaýyp alǵan.

«Jamankól aýylynyń turǵyny Marat Er-Temir Kenjeshulyn sý jaǵasynda júrgen ýaqytta túlki tistep alǵan. Azamatqa «Mańdaı-muryn aımaǵynyń túlki tistegen jaraqaty, baltyr jáne sannyń jyrylǵan jaraqattary» dıagnozy qoıyldy. Keıin túlkini zardap shekken turǵynnyń ákesi óltirip, mal dárigerlerine habar bergen. Onyń óleksesi mal qorymyna aparyp kómildi (zalalsyzdandyrý jumystary júrgizildi) jáne janýardan mı synamasy alyndy. Ol qutyrmaǵa oń nátıje kórsetti. Qazir «Er-Temir» sharýa qojalyǵynyń basshysy K.M.Baıjumanovtyń ıeliginde 130 bas iri qara, 742 bas usaq mal, 144 bas jylqy jáne 3 ıt bar», - dep jazylǵan sheshimge qosymsha berilgen túsindirmede.

Profılaktıkalyq maqsatta atalǵan eldi mekendegi 1 948 bas malǵa qutyrmaǵa qarsy vaktsına jasalǵan.