Aqtóbede qus fabrıkasy salynady
Kásipker fabrıkany «Batys Qytaı - Batys Eýropa» tasjolynyń boıyndaǵy aýyldardyń birine salý úshin jergilikti bılikten jer surady, dep habarlaıdy QazAqparat tilshisi.
Aqtóbede jylyna 40 myń tonna shujyq óndirip, daıyn ónimdi ishki naryqta jáne Reseıde saýdalaıtyn «Rokos» kompanııasy qus fabrıkasyn salýdy qolǵa aldy. Aýyl sharýashylyǵy salasyn damytýǵa baǵyttalǵan joba qus ósirýge qajetti jem-shópten bastap, daıyn etti satýǵa deıingi aralyqty qamtıdy. Ónim aldaǵy ýaqytta Kedendik odaq aýmaǵy men alys shetelge eksporttalady.
«Eksportqa baǵyttalǵan soń «Batys Qytaı-Batys Eýropa» halyqaralyq dáliziniń boıyn tańdap otyrmyz. Bul jol Reseıdiń Orynbor oblysyna taýar tasymaldaýǵa múmkindik beredi. Qazir jer alý, nesıe rásimdeý jumystaryn bastaımyz. Biz qala ishinen emes, bir aýyl mańynan fabrıka salyp, sol aýyldyń 200-den astam adamyn jumyspen qamtýdy josparlap otyrmyz»,- dedi «Rokos» kompanııasynyń ınnovatsııalyq damý departamenti basshysy Vıacheslav Shekanov.
Joba quny 50 mıllıon dollar. Fabrıka jylyna 20 myńnan 32 myń tonnaǵa deıin qus etin óndire alady. Munda tutynýshylarǵa tońazytqyshta muzǵa aınalǵan emes, salqyndatylǵan qus etin satýǵa múmkindik bar. Qazirgi ýaqytta oblys ákimdigi jobalyq-smetalyq qujattamaǵa saı jer bólýge ýáde berdi.