Aqtóbede qurylys kompanııasyna aldanǵan úleskerler ákimdikten kómek surady
Aqtóbelik úleskerler toqtap turǵan qurylys jumystarynyń jalǵasqanyn qalaıdy. Olar birneshe jyl buryn qur ýádege senip qalyp, páterge qajetti aqshanyń bir bóligin, keıbiri túgel aýdarǵan.
«Safına» turǵyn úı keshenine 3 bólmeli úı úshin 12,5 mln teńge aýdardym. Bul úıdi 2021 jyly jeltoqsanda tabystaýy tıis edi. Barlyǵy 120 úlesker bar. Áli kúnge deıin qurylysy aıaqtalmady», - deıdi qala turǵyny Aınur Berikqalıeva.
Bul turǵyn úı kesheni alǵashynda 5 qabatty bolady dep kelisilgen. Biraq birinshi, ekinshi korpýstardy 6 qabatty etip salyp, qazir joǵaryda ornalasqan páter ıeleri qujatyn rásimdeı almaı júr.
«2019 jyldan beri úıdi kútip júrmiz. Áýelde 6,2 mln teńge aqsha aýdardym. Jańa ınvestorǵa 700 myń teńge tóledim, ıaǵnı 7 mln teńgege 2 bólmeli páter ýáde etti. «Safına» TÚK úshinshi korpýsynan 800 mln teńge jınalǵan eken. Biraq, qurylysty aıaqtamady. Eki korpýsy salynǵan soń sendik, aqsha aýdardyq. Negizi 5 qabatty úı, biraq 6-qabaty da bar. Onyń qujaty joq. Bizge kómek kerek. Problema týyndaǵan soń ǵana ákimdikke keldik. Ózim úsh balammen apamnyń úıinde turyp jatyrmyn. Arzan bolǵan soń táýekelge baryp edik», - dedi Darına Amırova.
Aqtóbe oblysy ákimdigi bul máseleni sheshý úshin jer ýchaskesi rásimdelýi tıis dep otyr.
«Bizge «Safına» TÚK-nen adamdar keldi. Úı Batys-2 shaǵyn aýdanynda ornalasqan. Úıdiń birinshi, ekinshi korpýsy aıaqtalǵan. Al úshinshi, tórtinshi korpýsynda másele bar. Úshinshi korpýstyń jumysy jeńil. Úı qurylysynyń 70-80 paıyzy bitip tur. Qurylysty bitirý úshin qaıta qujat jasap jatyr. Olarmen baılanysqa shyqqan «Aqtóbe qazaq fınans» kompanııasynyń azamaty bar. Ol ınvestor emes, biraq úleskerlerden aqsha jınap, úı qurylysyn aıaqtaǵysy keledi. Qıyndyǵy – «Aqtóbe qazaq fınans» kompanııasynyń zańdy statýsy anyqtalmaǵan. Oǵan aqsha jınaýǵa bolmaıdy. Sondyqtan, turǵyn úı qurylysy kompanııasy bolyp qurylyp, qujatyn rásimdeýi tıis. Keıin ǵana merdiger bola alady. Birinshi qabatty salsa, soǵan aqsha tólesin. Buǵan deıin «Safına» kompanııasy 500, keıbir úıden 800 mln aqsha jınaǵan. Al, atqarǵan jumysy 100 mln teńgege de jetpeıdi. Qazir qylmystyq is qozǵalyp, tergeý júrip jatyr. Sondyqtan, turǵyndarmen kezdesip, ózge adamdarǵa aqsha jınama dep aıtyp jatyrmyz», - dedi oblystyq qurylys, sáýlet jáne qala qurylysy basqarmasynyń basshysy Naǵymjan Aldııarov.
Onyń aıtýynsha, Aqtóbede úleskerlerge bergen ýádeni oryndaı almaı, qurylysty aıaqtaý merzimin keshiktirgen 11 kompanııa bar.
«Ár úlesker jaıy jeke qaralady. Bıyl kóp másele sheshiledi. Tek 1-2 úı qurylysy keler jylǵa qalady. Sebebi, qylmystyq is qozǵalyp, qaralyp jatyr. Ázirge ekonomıkalyq jáne qurylys saraptamasy taǵaıyndaldy», - dedi Naǵymjan Aldııarov.
Foto avtordiki