Aqtóbede Qurban aıt kúnderi mal bazary jumys istemeıdi
Aqtóbede koronavırýs ınfektsııasyna shaldyqqan adamdar sany eki esege artty. «Qyzyl» aımaqtaǵy óńirde búgin jańa qaýly shyqty. Talap boıynsha kópshilik, merekelik jáne otbasylyq basqosý, onyń ishinde adamdar kóp jınalatyn shara ótkizýge bolmaıdy. Qurban aıt merekesi kúnderi, ıaǵnı, 20 – 22 shilde kúnderi aralyǵynda mal bazarlary jumys istemeıdi.
«Mal soıý oryndaryn anyqtaý jáne qurban shalý rásimderin onlaın formatta júzege asyrý uıymdastyrylýy tıis. Maldy tapsyryspen jáne veterınarlyq sertıfıkaty bar arnaıy bekette soıý qajet. Mal soıý ornyna bógde adam kirgizilmeıdi. Jedel respıratorlyq ınfektsııalar (joǵary temperatýra, jótel, tumaý) jáne basqa da juqpaly aýrýlar belgileri bar qyzmetkerler jumys istemeıdi. Qyzmetkerlerdi jumys ornyna kirgizbes buryn PTR test anyqtalmasy talap etiledi»,- dep jazylǵan oblystyq sanıtarııalyq-epıdemıologııalyq baqylaý departamentiniń basshysy Nursulý Berkimbaeva qol qoıǵan qaýlyda.
Mal soıý tsehtarynda veterınarııalyq - sanıtarııalyq norma talaptarynyń saqtalýyn arnaıy ınspektsııa mamandary baqylaıdy. Dezınfektsııa júrgizý úshin belgilengen tártippen tirkelgen jáne qoldanýǵa ruqsat etilgen, qoldaný jónindegi nusqaýlyqtarda vırýstyq ınfektsııalar kezinde obektilerdi zararsyzdandyrý rejımderi kórsetilgen dezınfektsııalaý quraldaryn qoldanylýy tıis. Belgilenbegen jerlerde turǵyndardyń mal soıýyna da jol bermelmeıdi. Muny baqylaý polıtsııaǵa júkteldi.