Aqtóbede kishkentaıynan kólik jóndep júrgen stýdent «Jyl adamy» atandy
Robert Mıftahetdınov Aqtóbe avtojol kolledji avtomobılderge tehnıkalyq qyzmet kórsetý, paıdalaný jáne jóndeý mamandyǵynyń 3 kýrs stýdenti.
Bıyl kolledjishilik, oblystyq «WorldSkills – 2023» baıqaýyna qatysyp, jeńimpaz atandy. Keıin respýblıkalyq jarysta da úzdik shyqty. Ol kishkentaıynan kólik jóndeıtin ákesiniń janynda júrip, tehnıkanyń qyr-syryn úırenip alǵan. Bul jolǵy konkýrsta Robert kóliktiń aqaýyn anyqtap, ony jóndeýde esh múdirmedi.
- Bala kúnimnen kólik jóndeımin. Ákem únemi meni jumysyna ertip ketetin, janynda júremin. Soǵan qarap úırendim. Qazirgi kezde maǵan da osy jumys unaıdy. Ol kisi – kásibı slesar. Aldaǵy ýaqytta men de kánigi maman bolǵym keledi. Kóliktiń bar qyr-syryn úırenip, avtojóndeý ortalyǵyn ashýdy oılap júrmin. Baıqaý kezinde kólik qozǵaltqyshyn jáne ózge de bólekterin jóndedim. Elektr dıagnostıka jasadym. Ol úshin úsh aı boıy daıyndaldym, - dedi Robert Mıftahetdınov.
Baıqaý jeńimpazy endi keler jyly kúzde Frantsııada ótetin jarysta el namysyn qorǵaıdy. Oǵan deıin Robert elektromobıldiń qurylysyn úırenýi tıis. Sol úshin de Almatyǵa baryp, sol jaqta daıyndalady.
- Men kóliktiń qaı jeri buzylyp turǵanyn anyqtaımyn, ony jóndeımin jáne iske qosamyn. Mindetim – osy. Bizde elektromobıl joq, sondyqtan Almatyǵa baryp, sheberligimdi shyńdaımyn, - dedi ol.
Robert Mıftahetdınovtiń sarapshysy ári Aqtóbe avtojol kolledji dırektorynyń orynbasary Erlan Safın shákirtiniń erekshe qabiletin aıtyp berdi.
- Robert kóliktegi aqaýdy tabýdy biledi. Oǵan árıne, oılaý júıesi kerek. Qoly ıkemdi bolýy qajet. Bolashaqta óz isiniń sheberi, jaqsy maman bolaryna senemin. Aldaǵy ýaqytta budan da jaqsy jetistikke jetedi. Josparymyz birinshiden, aǵylshyn tilin meńgerý, elektromobılderdiń qurylysyn oqyp úırený kerek. Sebebi kelesi jarysta osy talaptar bar, - dedi Erlan Safın.