Aqtóbede kirpini dop qylyp oınaǵan jigitter qylmystyq jaýapqa tartylady
Áleýmettik jelige jarııalanǵan vıdeodan úsh jigittiń kirpini bir birine teýip, dop qylyp oınaǵanyn kórýge bolady. Bul Trıatlon parkinde túsirilgen vıdeo. Biri aıaq kıimine jabysqan tikenderdi kórip tańqalyp, tazartýǵa kóshti. Polıtsııa osy vıdeony túsirgen adam pen kirpini tepkilegen jastardy tapty.
- Áleýmettik jelilerge monıtorıng júrgizý barysynda bir top jastyń tiri kirpini tepkilep, fýtbol oınaǵany anyqtaldy. Tekserý barysynda bul vıdeonyń Aqtóbe qalasynda túsirilgeni belgili boldy. Kúdiktiler anyqtalyp, polıtsııa bólimine jetkizildi. Qylmystyq kodekstiń «Janýarlarǵa qatygezdik jasaý» faktisi boıynsha is qozǵaldy,- dep habarlady Aqtóbe oblystyq Polıtsııa departamenti baspasóz qyzmetiniń jetekshisi Erbolat Sarqulov.
Aıta keteıik, QR Qylmystyq Kodeksine sáıkes janýarlarǵa qatygezdikpen qarap, onyń mertigýine ákelip soqqan jaǵdaıda 120 AEK mólsherinde aıyppul salynady nemese 30 táýlikke deıin qamaýǵa alynady.