Aqtóbede qoı júninen qurylys materıaly jasalady

AQTÓBE. QazAqparat - Aqtóbe qalasynda qoı júni óńdelip, odan jylý saqtaıtyn qurylys materıaly daıyndalady. Búgin zaýyttyń irgetasyn qalaý rásimi ótti, dep habarlaıdy QazAqparat tilshisi.

Aqtóbede «KazFeltec» JShS bolashaq toqyma emes materıaldar shyǵaratyn zaýyttyń irgetasyna kapsýla salyndy.

Sharaǵa Aqtóbe oblysynyń ákimi Eraly Toǵjanov, «KazFeltec» JShS dırektory Erlan Jańabergenov, kompanııa qyzmetkerleri qatysty.

Aıta keteıik, oblys ákimdigi, «KazFeltec» JShS jáne ıtalıandyq Corm arasynda konsortsıým qurý týraly kelisim byltyrǵy kúzde jasaldy.

Zaýyt shyǵaratyn negizgi ónim - ekologııalyq taza ári jylý saqtaý materıaldary.

Shıkizat retinde qylshyqty qoı júni paıdalanylady. Ázirge sharýalar júndi órtep, keıbiri qoqysqa laqtyryp jatyr.

Aldyńǵy aptada jańa óndiriske oblys boıynsha shıkizat satyp alý bastaldy. Bul aýyl turǵyndary úshin qosymsha tabys kózine aınalady.

«Búgingi kúni memleket tarapynan halyqtyń tabysyn arttyrý, áleýmettik jaǵdaıyn jaqsartý maqsatynda buryn-sońdy bolmaǵan, aýqymdy sharalar qabyldanýda. Sonyń dáleli - «Aýyl amanaty» jobasy. Atalǵan jobanyń bir baǵytynyń ózinde, 500-ge jýyq adam 18 myń qoı satyp alýǵa nıetti. Búgingi kúnniń ózinde oblysta 1 mln. 400 myń bas qoı tirkelgen. Jyl saıyn orta eseppen 2-2,5 myń tonna jún óndiriledi. Bul rette júndi satý mal sharýashylyǵyndaǵy problemalardyń biri. Búgin bul másele óz sheshimin tapqan kún. Biz aýyl sharýashylyǵynyń barlyq problemalyq máselelerin kezeń-kezeńimen sheshýge tyrysamyz», - dep atap ótti oblys ákimi Eraly Toǵjanov.

Ónimniń birinshi legi jyl sońynda shyǵarylady. Jańa kásiporyn 25 adamdy turaqty jumyspen qamtıdy.

Sonymen qatar, oblys aýdandarynda shıkizat qabyldaý pýnktterin ashý josparlanǵan. Bul jergilikti halyqty jumyspen qamtýǵa múmkindik beredi.

Jobaǵa tartylǵan ınvestıtsııanyń jalpy kólemi - 5,2 mlrd teńge.

Zaýyt qýaty jylyna - 2100 tonna. Jergilikti naryqtan bólek, ónimder Eýropaǵa eksporttalady dep josparlanǵan.