Aqtóbede kóshi-qon zańnamasyn buzǵan 400-den astam sheteldik elden shyǵaryldy
Bıyl Aqtóbe oblysyna 20 myńnan astam sheteldik keldi. Olar jumys isteý, oqý jáne otbasymen kezdesý úshin shekaradan beri ótken. Arasynda kásipkerler de bar.
- Sheteldikterdiń 90 paıyzy – eńbek mıgrattary. Olar jeke tulǵalardyń kelisimimen úı salýǵa keledi. Sonymen birge aýla sypyrýshy, bala kútýshi qyzmetterin atqarady. Bıyl 100-den astam sheteldiktiń tólqujat merzimi ótip ketken nemese joǵaltyp alǵan. Soǵan baılanysty olarǵa óz elderine oralý kýáligi berildi. Kóshi-qon zańnamasyn buzǵany úshin 1500-den astam sheteldik ákimshilik jaýapqa tartyldy. Onyń 400-den astamy sot qaýlysymen elden shyǵaryldy, - dedi Aqtóbe oblystyq PD Kóshi-qon basqarmasy bastyǵynyń orynbasary Sapar Amantaev.
Eske salsaq, «Quqyqtyq tártip» jedel-profılaktıkalyq is-sharasy barysynda kóshi-qon qyzmetiniń mamandary Pákistan Islam Respýblıkasynyń alty azamatyn anyqtady.