Aqtóbede koronavırýs juqtyrǵan 400-ge jýyq adam em qabyldap jatyr

AQTÓBE. QazAqparat – Aqtóbede ótken táýlikte 127 adamnan koronavırýs ınfektsııasy anyqtaldy. Qazirgi kezde 400-ge jýyq naýqas ınfektsııalyq statsıonarlarda jatyr, dep habarlaıdy QazAqparat tilshisi.

Aqtóbede epıdemıologııalyq jaǵdaı kúrdeli. Keshe óńirde 127 adamnan koronavırýs ınfektsııasy anyqtalyp, aýrýhanaǵa tústi.

«Vırýs juqtyrǵandardyń 106-y derttiń sımptomdy túrine shaldyqqan. Arasynda Alǵa, Temir, Mártók, Muǵaljar, Qobda, Baıǵanın, Oıyl, Shalqar, Hromtaý sekildi 9 aýdannyń turǵyny bar. Aýrýshańdyqtyń ósý deńgeıi 2 paıyzdan asyp ketti. Aıta ketken jón, búginge deıin barlyǵy 5449 jaǵdaı tirkeldi. Qazir 2 myńǵa jýyq adam úı karantıninde otyr. Olar dárigerler baqylaýynda»,- dedi oblystyq sanıtarııalyq-epıdemıologııalyq baqylaý departamentiniń basshysy Nursulý Berkimbaeva.

Qazir Aqtóbe oblysynda 400-ge jýyq naýqas em alyp jatyr.

«Oblys boıynsha ınfektsııalyq statsıonarlarda 398 adam jatyr. Onyń ishinde 261-i Aqtóbe qalasynda. Jan saqtaý bóliminde 21 naýqas bar. Onyń 4-i ókpeni jasandy jeldetý apparatyna qosylǵan. Kereýet sanyn arttyp jatyrmyz. Sebebi naýqastar sany kún ótken saıyn artyp keledi. Qazir 1115 kereýet daıyn», - dedi oblystyq densaýlyq saqtaý basqarmasynyń basshysy Rústem Isaev. Sonymen birge eki júkti áıel de koronavırýs ınfektsııasynan em qabyldap jatyr.