Aqtóbede kópqabatty úıdiń balkony órtendi

AQTÓBE. QazAqparat – Aqtóbede kópqabatty úıdiń balkony órtendi. Órt sóndirýshiler 60 adamdy evakýatsııalady, dep habarlaıdy QazAqparat tilshisi.

Aqtóbe qalasy Ábilqaıyr han dańǵylynda ornalasqan 9 qabatty úıdiń balkonynan órt shyqty. Oqıǵa ornyna oblystyq tótenshe jaǵdaılar departamentinen 57 adam 10 tehnıka jumyldyryldy.

«Shaqyrtý túsken soń biz oqıǵa ornyna bes mınýtta jettik. Barlyǵy 60 adam evakýatsııalanyp, 10 adam qutqarý satysy arqyly tómen túsirildi. 9 qabatty úıdiń tórtinshi qabatynan bastap órt shyqqan. Tek balkondar jandy. Qazirgi kezde órttiń shyǵý sebebi anyqtalyp jatyr», - dedi oblystyq TJD bastyǵy Marǵulan Amanbaev.

Aıta keteıik, órt týraly habarlama saǵat 16:50-de túsip, qyzmetkerler oqıǵa ornyna bes mınýtta jetedi. Olar órtti 17:05-te sóndirdi.