Aqtóbede kópbalaly analardy bilikti dárigerler qarap jatyr
Aqtóbede Elbasy Nursultan Nazarbaevtyń «Nur Otan» partııasynyń sezinde bergen tapsyrmalaryn oryndaý maqsatynda jan-jaqty jumys júrip jatyr. Áleýmettik sala mamandary baspasóz máslıhatynda qolǵa alynǵan isterdi baıandady. Oblystyq densaýlyq saqtaý basqarmasynyń basshysy Áset Qalıevtiń aıtýynsha, bıyl Aqtóbede ýchaskelik dárigerlerdiń júktemesin azaıtý jumysy júredi. Bir dárigerge 1500 adam mindetteledi. Sondyqtan osy jyly óńirde qosymsha 23 ýchaske ashylady.
«Qan qysymynyń joǵarylaýy, sozylmaly júrek jetispeýshiligi jáne qant dıabetine shaldyqqan adamdardy baqylaý kúsheıdi. Osy úsh dert esepte turǵan adamdardyń 70 paıyzyn qamtıdy. Júkti áıelder men júktilikti josparlaý da baqylaýda bolady. Ýchaskelik dárigerlerdiń eńbekaqysyna 20-25 paıyz aqsha qosylady. Qazir bul jumys iske asyrylyp jatyr. Ol úshin respýblıkalyq bıýdjetten 288 mıllıon teńge kóleminde qarjy bólindi. Qazir 1041 medıtsına qyzmetker arnaıy sertıfıkat alyp, jumys istep jatyr», - dedi oblystyq densaýlyq saqtaý basqarmasynyń basshysy Áset Qalıev.
Aqtóbede aýyldaǵy medtsınalyq qyzmettiń qoljetimdiligin qamtamasyz etý de josparlandy. Ótken jyly 18 medıtsınalyq nysan iske qosyldy. Bıyl 10 dárigerlik ambýlatorııa, feldsherlik beket salynady. Sonymen qatar, Aqtóbe oblysyna 36 sanıtarlyq avtokólik satyp alý josparlandy. Onyń 13-i reanımobıl, 3-i jyljymaly medtsınalyq keshen bolady.
«Ótken jyly 34 aýylǵa jyljymaly medtsınalyq keshen bardy. Kardıodesant, onkodesant jumys istep tur. Mobıldi klastermen aýylǵa baryp, kópbalaly, muqtaj otbasyndaǵy áıelderdi tekserý júrip jatyr. Senbi saıyn emdeý mekemelerinde ashyq esik kúni ótýde», - dedi Áset Qalıev.