Aqtóbede kommýnaldyq mekeme tutynýshylardyń mıllıondaǵan qarjysyn qaıtaryp berdi

AQTÓBE. QazAqparat - Aqtóbedegi kópqabatty turǵyn úıdiń ár páterin elektr togyna jalǵaýy tıis «Energosıstema» seriktestigi qyzmeti úshin 2 500 teńgeden jınap alǵan. Tutynýshylar oǵan 10,5 mıllıon teńge tóledi. Al bul qyzmetti qurylys kompanııasy ótegen bolatyn. Aqtóbe oblystyq prokýratýrasynyń tekserýinen soń tutynýshylardyń mıllıondary keri qaıtaryldy, dep habarlaıdy «QazAqparat» tilshisi.

«Energosıstema» seriktestigi 4 myńnan astam tutynýshysyna shyǵyn keltirdi. Qurylys kompanııasy elektr togyn jalǵaý qyzmeti úshin aqy tólegenimen, kommýnaldyq mekeme ár páterden 2 500 teńgeden jınap alǵan. Prokýratýra tabıǵı monopolııany retteý jáne básekelestikti qorǵaý zańdylyǵyn tekserý kezinde shyǵyndy anyqtap, 10,5 mıllıon teńge tutynýshylarǵa qaıtaryldy. Sonymen qatar, kommýnaldyq mekeme ózine tıesili emes elektr togyna qyzmet kórsetý ótinishterin qaraý merzimin buzǵan»,- dedi oblystyq prokýratýranyń baspasóz qyzmetkeri Nurlybek Abatov.

Aıta keteıik, tabıǵı monopolııa zańdylyǵyn buzǵan «Energosıstema» seriktestigi ákimshilik jaýapkershilikke tartylyp, 3,5 mıllıon teńge aıyppul salyndy. Sonymen qatar, 14 prokýrorlyq tekserý kezinde 18 monopolııa sýbektisi ákimshilik jaýapqa tartyldy.

Altynaı Saǵyndyqova