Aqtóbede kómirdiń ár tonnasy 20-25 myń teńgege satylyp jatyr

AQTÓBE. QazAqparat – Aqtóbe oblysyna bıyl turǵyndar úshin 22 myń tonna kómir qajet. Qazir saqtaý oryndarynda tonnasy 18 500 teńge bolsa, aýyldarda 20-25 myń teńgeden satylyp jatyr, dep habarlaıdy QazAqparat tilshisi.

Aqtóbe oblysy boıynsha bıýdjettik uıymdar úshin 32 275 tonna kómirdiń 28 978 tonnasy, ıaǵnı 90%-y jetkizildi. Al 1 904 tonna dızel otynynyń 1 612 tonnasy, ıaǵnı 80%-y daıyn.

«Aldaǵy jylytý maýsymyna turǵyndar úshin qajetti kómir kólemi - 22 myń tonna. Búgingi tańda 9 528 tonnasy, ıaǵnı 43 paıyzy turǵyndarǵa jetkizildi. Sonymen qatar, 11 vagonmen 770 tonna kómir ákelinip jatyr. Oǵan qosymsha 2 480 tonna kómir saqtaý ornynda bar. Jińishke stansasynda - 280, 41 razezde - 2 200 tonna. Satý quny tonnasyna - 18 500 teńge», - dedi Aqtóbe oblystyq energetıka jáne TÚKSh basqarmasynyń basshysy Erjan Muzdybaev.

Qobda aýdany Aqyrap aýyly turǵynynyń aıtýynsha, qazir turǵyndar kómirmen qatar tamyzyqqa dep aǵash pen qı satyp alady.

«Kómir baǵasy bizge jetkizilgende 20-25 myń teńge bolyp ketedi. Tasymaldaý quny qosylady. Sondyqtan ony kóp ala almaımyz. Ózim 1-1,5 tonna alamyn. Qysqa dep tamyzyqqa aǵash alamyn. Onyń tekshe metrin 3-4 myń teńgege baǵalaıdy. Bul - ózara kelisim. Negizi ol da 5-7 myń teńge turady. Al qıdyń bir tirkemesin 5 myń teńgege alamyz», - dedi aty-jónin jasyrýdy jón kórgen turǵyn.