Aqtóbede komendanttyq saǵat tártibin saqtamaǵan 400-ge jýyq adam ustaldy
10:08, 09 Qańtar 2022
AQTÓBE. QazAqparat - Aqtóbede komendanttyq saǵat tártibin saqtamaǵan 400-ge jýyq adam ustaldy. 11 uıymdastyrýshy men iritki salýshy kúdikti qolǵa tústi, dep habarlaıdy QazAqparat tilshisi.
Aqtóbe qalasy men oblys aýmaǵynda quqyqtyq tártipti baqylaý jumysy jalǵasyp jatyr.
«Ótken túni komendanttyq saǵat tártibin buzǵan 367 adam ustaldy. Sonymen qatar 11 uıymdastyrýshy men iritki salýshy kúdikti ustaldy. Qazirgi ýaqytta olardyń ekeýine qatysty QR QK 272-baby 1-bóligine, ıaǵnı, «Jappaı tártipsizdikti uıymdastyrý« baby boıynsha qylmystyq is qozǵaldy. Kúdiktiler qamaýǵa alyndy. Qalǵandarynyń is-áreketine qatysty zańdy baǵasy beriledi. Oblys turǵyndarynan tynyshtyqty saqtap, dúrbeleń men arandatýshylyqqa ermeýdi suraımyz»,- dedi Aqtóbe oblysynyń komendanty Qanat Álıev.
Buǵan deıin habarlaǵanymyzdaı, Aqtóbede suıytylǵan gaz baǵasy 50-55 teńge.