Aqtóbede kólikte tirideı janyp ketken 8 jolaýshynyń teń jartysy — oqýshylar

<p>AQTÓBE. KAZINFORM &mdash; Aqtóbe-Atyraý tasjolynda bolǵan jol-kólik apaty kezinde 8 jolaýshy janyp ketti. Onyń teń jartysy oqýshy.</p>

Aqtóbe oblysynda qazir jol-kólik oqıǵasyna baılanysty tergeý jumysy júrip jatyr.

Polıtsııamen qatar prokýrorlar da isti baqylaýǵa aldy. 

Al Aqtóbe oblystyq bilim basqarmasy bolsa, qaza tapqandar arasynda 4 bala bar ekenin habarlady. 

— Jol apatyna ushyraǵan azamattardyń, balalardyń qazasyna kóńil aıtamyz, qaıǵysyna ortaqpyz. Qaza tapqandardyń arasynda kámelet jasyna tolmaǵan 4 bala bar. Olar densaýlyǵyna, otbasylyq sebepterge baılanysty jeke saparǵa shyqqan. Quzyrly organ qyzmetkerleri tergeý amaldaryn júrizýde, — dep habarlady Aqtóbe oblystyq bilim basqarmasynyń basshysy Jaıyq Sultan.

Aıta keteıik, qaza bolǵan tórt balanyń ekeýi bir otbasynan. Biri 4-synypta, ekinshisi 6-synypta oqıdy.

Sonymen birge taǵy bir bala 6-synypta bilim alsa, tórtinshisi — daıarlyq tobynyń oqýshysy. 

Bári de — Aqtóbe oblysy Temir aýdany Sarykól aýyldyq okrýgine qarasty Shubarshı aýylynyń turǵyndary. 

Aıta keteıik, olar mingen taksı Shubarshı aýylynan Aqtóbe qalasyna qaraı baǵyt alǵan.