Aqtóbede qoqys shyǵarý quny eki ese qymbattady
Aqtóbe qalasyndaǵy turmystyq qatty qaldyqty tasymaldaý kompanııalary tarıfti úsh ese qymbattatýdy surady. Búgin qalalyq máslıhat depýtattary úsh kompanııanyń usynysyn qarap, sheshim shyǵardy.
«Qazirgi ýaqytta qalada qoqys shyǵarý máselesi turaqtaldy. Turmystyq qatty qaldyqty shyǵarý mindetin óz moınyna alǵan úsh kompanııanyń óz tehnıkasy bar. Olar 40-tan astam qoqys shyǵaratyn kólik pen 20 arnaıy mashına satyp aldy. Endi páter ıeleriniń tizimin qaıta jańǵyrtý jumysy júrip jatyr. Úsh kompanııa kópqabatty úılerdegi qoqys shyǵarý qunyn ár adamǵa 305 teńge, al jeke turǵyn úılerge 349 teńgege kóterýdi usyndy. Saraptama qorytyndysy kezinde Aqtóbe qalasyndaǵy qoqys shyǵarý quny eń arzan bolyp shyqty. Máselen, Oralda - 215, Shymkentte - 200, Qaraǵandyda - 221 teńge. Turǵyndarmen kezdesip, tarıf týraly aıtyldy. Jıynda tarıfti kópqabatty turǵyn úılerge 180, al jeke úılerge 200 teńge etip kóterý bastamasy qoldaý tapty»,- dedi Aqtóbe qalalyq turǵyn úı-kommýnaldyq sharýashylyq bóliminiń basshysy Ibraım Kúzbaev.
Aıta keteıik, Aqtóbe qalasyndaǵy qoqys shyǵaratyn kompanııalardyń biri jumysyn toqtatyp, ekinshisi qyzmet kórsetýden bas tartty. Mamyr aıynan beri qala aýmaǵy 10-ǵa bólinip, merdiger kompanııalardyń tizimi jarııalandy. Arnaıy tehnıkasy joq kompanııalar eki aıdan soń qyzmet kórsetýden bas tartyp, qala qoqysqa tola bastady. Qazir qala terrıtorııasy 4 bólikke bólinip, 3 kompanııa qyzmet kórsetip jatyr.