Aqtóbede qoqys óńdeıtin zaýyt salý jobasy qaraldy
Aqtóbe oblysynyń ákimdiginde óńir basshysy Ońdasyn Orazalın WABIO Technologie GmbH kompanııasynyń atqarýshy dırektory Rafael Flıttspen jáne Braun Industrial Trading GmbH komanııasynyń bas atqarýshy dırektory Esıf Braýnmen kezdesti. Kezdesý barysynda sheteldik kásiporyndardyń basshylary Aqtóbede salynatyn qaldyqtardy qaıta óńdeý zaýytynyń jobasyn usyndy. Joǵary ekologııalyq standarttarǵa saı keletin zaýyt ónerkásiptik, kommýnaldyq jáne turmystyq qaldyqtardan elektr energııasyn, gaz ben aýyl sharýashylyǵyna qajetti tyńaıtqysh shyǵarýǵa múmkindik beredi.
«Taraptar qyzyǵýshylyq tanytyp, jobany júzege asyratyn jáne ári qaraıǵy josparlar jaıynda kelisti. Oblys ákimi joǵary tehnologııalyq óndiristiń Aqtóbeniń ekologııalyq jaǵdaıyn jaqsartýda mańyzy zor bolatynyn atap ótti. Zaýyt memlekettik-jeke seriktestik aıasynda salynady. Jalpy Braun Industrial Trading GmbH (Germanııa) kompanııasynyń dástúrli jáne balamaly energetıka salasyndaǵy birlesken jobalardy júzege asyrýda 30 jyldyq tájirıbesi bar. WABIO® (Germanııa) kompanııasymen seriktestikte Qytaı jáne Eýropalyq keńes, Azııa elderinde turmystyq qaldyqtardy qaıta óńdeıtin zaýyttar jobalanyp, salynǵan bolatyn. Olardyń quramyna organıkalyq qaldyqtardy qaıta óńdeıtin bıogazdy elektr stansalary kiredi»,- dep habarlady oblys ákiminiń baspasóz qyzmeti.