Aqtóbede kóktemgi sý tasqynynda qansha joldy sý shaıǵany belgili boldy

AQTÓBE. QazAqparat – Bıyl kóktemgi sý tasqyny kezeńinde respýlıkalyq 5, oblystyq jáne aýdandyq mańyzy bar 7 joldan sý ótip ketti. Saldarynan birneshe aýylǵa qatynas ýaqytsha shekteldi, dep habarlaıdy QazAqparat tilshisi.

Aqtóbe oblysy boıynsha Oıyl jáne Qobda aýdandarynda kóktemgi sý tasqyny kezeńi aýyr ótti.

Bul eki aýdanda da jergilikti deńgeıde tótenshe jaǵdaı jarııalanyp, úılerge sý kirdi.

Qazirgi kezde arnaıy komıssııa shyǵyndy eseptep jatyr.

Al Qobda aýdanynda 24 úıdiń qurylysy bastaldy.

Oblystyq jolaýshylar kóligi jáne avtomobıl joldary basqarmasynyń basshysy Aıbek Qaıyr bıyl kóktemgi sý tasqyny kezeńinde sý ótken joldar men kópirler jaıyn aıtty.

«Bıyl respýlıkalyq 5, oblystyq jáne aýdandyq mańyzy bar 7 joldan sý ótip ketti. Baıǵanın aýdanyndaǵy Noǵaıty aýylyna kireberis jolǵa byltyr sý ótkizý qubyrlary salyndy. Bıyl sý kóp kelip, janyn shaıyp ketti. Eki kúnde jol qaıta qalpyna keltirildi. Temir aýdanynda sý jınalyp, joldyń ústinen ótti. Munda joldy shaımady, tek ústinen ótip ketti. Tótenshe jaǵdaılar qyzmeti oqıǵa ornyna baryp, sý sorý jumystaryn júrgizdi. Al Oıyl men Qobda aýdanynda sý kóp keldi. Oıylda eki kópirdi sý shaıdy. Buǵan deıin jeńil kóliktiń júrýine ruqsat etti. Jóndeýden keıin júk kóligi de júre alady. Qobda aýdany boıynsha Qobda-Jırenqopa aýyly aralyǵynda joldan sý ótip ketti»,- dedi oblystyq jolaýshylar kóligi jáne avtomobıl joldary basqarmasynyń basshysy Aıbek Qaıyr.

Aıta keteıik, joldar men kópirlerdiń keıbirinde byltyr jóndeý jumysy bastalyp, bıyl aıaqtaý josparlanǵan.

Máselen Alǵa aýdany Qaraqudyq aýylyna aparar avtomobıl jolyna sý ótkizgish qubyryn salý úshin qazynadan 30 mln teńgeden astam qarjy qarastyrylǵan.

Byltyr sý ótkizgish qubyry ornatylyp, jerdi nyǵaıtý jumystary atqaryldy.

Alaıda kúzde jumys tolyq oryndalmady. Saldarynan kóktemgi sý tasqyny saldarynan sý ótkizgish qubyrlarynyń astyńǵy jaǵyn sý shaıdy.

«Merdiger kemshilikterdi joıyp, jobaǵa sáıkes barlyq tıisti jumysty tolyq kólemde atqarady. Búgingi kúni Qaraqudyq aýyly turǵyndarynyń oblys jáne aýdan ortalyǵyna qatynaýy úshin Aqtóbe-Bolgarka-Shubarqudyq oblystyq mańyzy bar avtomobıl joly ashyq. Olar aýylǵa Úshqudyq aýyly arqyly bara alady», - dep habarlady oblys ákiminiń baspasóz qyzmeti.