Aqtóbede kóktemgi tasqyn kezinde buzylǵan bógetterdi jóndeýge 3 mlrd teńge qajet

<p>AQTÓBE. KAZINFORM &ndash; Kóktemgi sý tasqyny kezinde Aqtóbede 15 bóget buzylǵan. Úsheýiniń kepildik merzimi bolsa, qalǵan 12 bógetti jóndeýge 3 mlrd teńgeden astam qarjy qajet.&nbsp;</p>

Aqtóbede sý qorǵaý bógetteri men gıdrotehnıkalyq qurylystardy tekserý komıssııasy qurylyp, onyń qorytyndysy shyqty. Aqtóbe oblysynyń Tabıǵı resýrstar jáne tabıǵatty paıdalanýdy retteý basqarmasynyń basshysy Sábıt Dúısekenovtiń aıtýynsha, oblysta 611,8 mıllıon tekshe metr sýdy saqtaıtyn 206 gıdrotehnıkalyq qurylys bar. Onyń 10-y – respýblıkalyq, 174-i – kommýnaldyq, 22-si – jeke menshik. 2023 jyly 4 bógetke kúrdeli jóndeý jumystary júrgizildi. Olar: Alǵa aýdanyndaǵy Kósem, Áıteke bı aýdanyndaǵy Tereńsaı jáne Şerbakov, Mártók aýdanyndaǵy Qazan-2 bógetteri. Kóktemde osy bógettiń úsheýi buzyldy. 

– Bıyl kóktemgi sý tasqyny kezinde kommýnaldyq menshiktegi 15 bóget jaryldy. Olardyń qatarynda byltyr jóndelgen úsh bóget bar. Olar: Şerbakov, Tereńsaı jáne Kósem. Kelisimshart boıynsha olarǵa 2 jyldyq kepildik berilgen. Jóndeý jumystaryn júrgizgen kompanııalar óz qarajatyna bógetterdi qalpyna keltiredi. Şerbakov bógetine qatysty qylmystyq is qozǵalyp, tergeý júrip jatyr. Qalǵan 12 bógetti qalpyna keltirý úshin 3 mıllıard teńgeden astam qarajat qajet,- dedi Aqtóbe oblysynyń Tabıǵı resýrstar jáne tabıǵatty paıdalanýdy retteý basqarmasynyń basshysy Sábıt Dúısekenov. 

Qarjy mınıstrligi jáne Sý sharýashylyǵy jáne ırrıgatsııa mınıstrligi qarjy máselesin birlesip qarastyryp jatyr. 

– Birinshi kezekte jóndelýi kerek jobalar aýdan ákimderimen kelisildi. Respýblıkalyq bıýdjetten 2 mıllıard teńgeden astam qarjy bólinýi qajet. Qalǵan qarjy jergilikti bıýdjetten alynady. Búginde qala boıynsha eki ózenniń túbin tazartý kerek. Barlyq másele qarjylandyrýǵa baılanysty aldaǵy ýaqytta sheshiledi, - dedi oblys ákimi Ashat Shaharov.

Eske salsaq, kóktemde Áıteke bı aýdanyndaǵy Şerbakov bógeti buzylyp, sol aýdanda úılerge sý kirdi.