Aqtóbede qoqys jınaıtyn kompanııa jumysshylary narazylyqqa shyqty

<p><span style="font-family: sans-serif; font-size: 18px;">Aqtóbede taıaýda ǵana ashylǵan &laquo;AKT Qyzmet&raquo; kompanııasynyń jumysshylary búgin qoqys shyǵarýdan bas tartty. Olar jumys istegen kúnderiniń ýaqyty tolyq eseptelýin, qarapaıym tústený, jýynýǵa jaǵdaı jasaýdy, tipti ájethana salyp berýdi surady, dep habarlaıdy QazAqparat tilshisi.</span></p>

«Aqtóbe» ÁKK-y janynan «ATK Qyzmet»» kompanııasynyń 30-dan astam jumysshysy tańnan beri jumys ornynda. Biraq eshqaısysy qala ishindegi qoqysty jınaýǵa shyqqan joq.
«Qazir men júrgizýshi bolyp jumys isteımin. Bir aı boldy osy qyzmetke qabyldanǵanyma. Búgin qoqys jınaýǵa shyqpaı qaldym. Bizge adam retinde qaramaıdy. Unamaı qalsań «aýladan shyq, ket» deıdi. Ár otbasynyń kredıti bar, bala-shaǵasyn asyraý kerek. Bizdiń jumys kestemiz rettelmegen. Maǵan belgilengeni úsh shaǵyn aýdan. Olar: 8 shaǵyn aýdan, Grının kóshesi, AvtoTsON aýmaǵy. Osy jerde kúnde jınaımyn. Aptasyna 7 kún bolsa, bárine shyǵamyz. Keıde qoqys az bolsa, son kúndi paıdalanyp, demalamyz»,- dedi júrgizýshi Baýyrjan Berdıev.

Foto: QazAqparat/Altynaı Saǵyndyqova

Al júrgizýshi Qaırat Janǵanashevtiń aıtýynsha, kelisimshart boıynsha aptasyna 40 saǵat qana jumys isteý kerek dep esepteıdi.

«Biz qoqys jınaımyz. Jýynýǵa múmkindik joq. Keńsege kelsek, ájethana da joq. Mynanyń jan-jaǵy ájethana bolyp ketti. Bir brıgada júrgizýshi, sosyn 2-3 júk kóterýshi bolady. Tańerteń 7:00-de shyǵyp, saǵat 17:00-ge deıin júresiń. Mindetimiz – bekitilgen aýmaqtaǵy qoqysty ýaqytyly shyǵarý. Bárine kelisemiz, tek artyq saǵat jazylýy tıis, aýyryp qalsaq, ol da tólenýi kerek»,- dedi ol. Jumysshylarmen sóılesýge Aqtóbe qalalyq túrǵyn úı-kommýnaldyq-sharýashylyq, jolaýshylar kóligi jáne avtomobıl joldary bóliminiń basshysy Bolat Serikov te keldi. Ol jumysshylar talaby eskeriletinin, biraq jumysty toqtatýǵa bolamaıtynyn aıtty.

«Qoqys shyǵaratyn kompanııa buǵan deıin «Aqtóbe» ÁKK-ynda boldy. Endi ony qalalyq ákimdikke, naqtylasaq qalalyq turǵyn úı-kommýnaldyq sharýashylyq, jolaýshylar kóligi jáne avtomobıl joldary bólimine berdi. Endi berý-qabyldap alý júredi. Basshylary da aýysýy múmkin. Jumysty toqtatpaı, jalǵastyraıyq»,- dedi Aqtóbe qalalyq TÚKSh, jolaýshylar kóligi jáne avtomobıl joldary bóliminiń basshysy Bolat Serikov.

Alǵashqy kezde 8 adam óz qarsylyǵyn bildirgen. Keıin ujym bir-birin qoldap, túgel toqtatqan.
«Biz ýaqytty tekke ketirmeı, búgin kólikterge dezınfektsııa jumystaryn júrgizdik. Búgingi jaǵdaıǵa baılanysty akt toltyryp, ishki tekserý júrgizetinin aıtyp otyrmyz. Bul jumysshylardyń talaby orynsyz. Olar aýyzeki tilde emes, jazbasha aryzyn túsirýi tıis. Bizde belgili bir kúni demalys berý degen joq. Adamdar senbi-jeksenbi kúnderi demalady, sol kúni qoqys kóbeıedi. Al bizdiń jumysshylar sol kúnderi de eńbek etedi, al apta ortasynda demalysyn alady. Batys-2 shaǵyn aýdanynda kún saıyn, al ózge shaǵyn aýdandar, turǵyn alaptarynda aptasyna 2 ret jınalady. Bizde 34 júrgizýshi, 74 júk kóterýshi bar. Júrgizýshi kóp tipti. Qysqartýǵa da bolady. Alǵashynda eki aýysymda eńbek etti, qazir bir aýysymǵa aýystyrdyq. Sondyqtan monıtorıng júredi, taldaý shyǵarylady»,- dedi «ATK qyzmeti» JShS-i basshysynń orynbasary Álibek Sereshov.

Foto: QazAqparat/Altynaı Saǵyndyqova

Onyń aıtýynsha, jumys ornynda ishimdik ishken, shý shyǵarǵan 4 adam jumystan shyǵarylǵan. Mundaǵy adamdardyń eńbekaqysy 200 000-250 000 teńge.

Eske salsaq, Aqtóbe qalasynda qoqys shyǵarý tarıfi kóterilip, jergilikti ákimdik «Aqtóbe» ÁKK-y janynan «ATK Qyzmet» kompanııasyn qurdy. Qoqys tasymaldaıtyn kompanııa úshin korporatsııadan 3 mıllıard teńge qarjy qarastyryldy. Oǵan tehnıka satyp alyndy. Qazir kópqabatty turǵyn úıdegi ár adamǵa aıyna 417, al jeke úılerde ár adamǵa 450 teńge esepteledi.